L’avé inn foi pou inn bone foi mésyé lo Foi la manz son foi èk in grinnsèl.
L’avé in marmaye téi apèl Raboutity. In zour li té apré bate son karé épi li la pass dsou in pyé d’boi. Kékshoz mi koné pa la intérèss ali é li la mont dsi lo pyé d’boi . Movèz shans, l’avé in bransh pouri é li la mont dosi, lo bransh la kasé é li la tonb atèr. An plis li la kass son zanm – asiz a tèr, li tienbo son zanm dann son braé li l’asiz épi li di :
Pyé d’boi-la la kass la zanm Raboutity ! Na poin arien lé for konm in pyé d’boi . Lé vré, moin lé for, l’ot la réponn ali, mé lo van i plie amoin épi i kass mon bransh. Lo van i pliye épi i kass pyé d’boi, pyé d’boi i kass la zanm Raboutity, néna poin arien lé pli for par k’lo van.
Lé vré, moin lé for, lo van la di, mé lo mir i drèss dovan moin é mi gingn pa pass par dsi. Lo mir i arète lo van, lo van i plie pyé d’boi épi i kass son bransh, pyé d’boi i kass la zanm Ra boutity, na poin arien lé pli for par k’ lo mir.

Kriké ! Kraké ! Kriké Mésyé ! Kraké Madam !
Lé vré moin lé for, lo mir i di. Mé lo ra i ronj mon mortyé épi li fé l’ trou dan mon kor. Lo ra i fé in trou dann mir, lo mir i arète lo van, lo van i plie pyédboi épi i kass son bransh, néna poin arien lé pli for k’ lo ra.
Lo ra la di oui, moin lé for toulbon mé lo shate i manz amoin. Lo shate i manz lo ra, lo ra i fouye trou dann mir, lo mir i arète lo van, lo van i plie pyé d’boi épi i kass son bransh, pyé d’boi i kass la zanm Raboutity. Na poin arien lé for konm lo shat.
Lé vré lo shat i di, moin lé for pou d’bon, mé la kord i trang amoin. La kord i trang lo shat, lo shat i manz lo ra, lo ra i fouy lo trou dann mir, lo mir i arète lo van, lo van i pliy pyé d’boi épi i kass son bransh, pyé d’boi i kass la zanm Raboutity. Na poin arien lé for konm la kord.
Lé vré moin lé for, la kord i di mé kouto i koup amoin. Kouto i koup la kord. La kord i trang lo shat. Lo shat i manz lo ra.lo ra i fouy trou dann mir. Lo mir i arète lo van. Lo van i plie pyé d’boi épi i kass son bransh. Pyé d’boi i kass la zanm Raboutity. Na poin arien lé for konm kouto.

Promyé morso i arète tèr-la, mèrkrodi proshin nou va oir dézyèm morso.