Matante Zélida la ékrir Justin :
Mon shèr nové, mon spès salté,
Alor, koméla bann rouj-de-fon i souète pi la bone ané, zot promète lo moun in l’ané difisil, pli difisil ké difisil. Zot lé tousèl pou dir sa, pars, sanm pou moin, lo moun i oi pa lé shoz konmsa. Sa i fé pans amoin in zistoir ; L’avé inn foi, in boug té i pass son tan pou kriy : « papang volèr poul, papang volèr poul ! ». E kan demoun té i vien, avèk baton, galé, pou fé kour lo zoizo d’malèr, li té i pète a rir pars li té i di sa pou farsé. In zour, papang l’arivé pou d’vré, li la kriyé, épi pèrsone la pa vni. La malshans pou li, papang la vol son gro poul pondante. Li la rogrète sa fars, avoir zoué lo zé ké li la zoué. Tok ! pran sa pou toi !

Justin la fé pou répons :
Mon vyé matant ki koz touzour la boush rouvèr,
Zistoir pou zistoir moin na inn an vré pou ou. La poin lontan, in pèr d’famiy la di amoin : « La kriz ! Kèl kriz ? Mi oi pa » ; I fo dir, li-mèm, son zann épi son fiy lété ki travay a titré ; Finn l’ané, la shanj program. Lé troi la pèrde travay. Estèr-la zot té i oi pi lé shoz avèk lo mèm zyé. Sé rapèl aou, tou lé zour, nana trann-sink pèrsone i pèrd travay. Plis 140.000 moun i rode in boulo san trouvé. Alor, matante, zistoir sé zistoir, mé la vi, la Rényon, sa lé pli amèr k’lo fyèl.

Justin