Donk inndé pèrsone dann l’androi l’avé dovine kosa k’la s’passé. Kosa k’la s’passé pou vréman ? Madam épi mésyé Oaro Mizèr la anprète larzan la famiy « i zoué pa èksa », lo pti kapital zot l’avé tir dann la vant in pti mézon, san papyé, san arien, san pass dovan notèr zis dsir parol é kan zot la parti domann pou ranbours azot « I zoué pa èk sa » la domann si zot néna la prèv zot la prète ali larzan. Aprésa rien a fèr pou fé ranbours azot si tèlman k’in zour madam Oaro Mizèr la komans fé novène dsi novène pou pini lo lanprintèr indélika sansa pou fé ranbours ali. Sé konmsa, dopi tan-la listoir la fanm san tète la komans kour dann lo pti kartyé.
L’avé inn foi pou inn bone foi mésyé lo foi la manz son foi avèk in grinnsèl.

Mé o fète, pou kosa i di la fanm san tète ? Pou kosa san tète ? Pars d’apré sak i di kan madam Oaro téi vien lo soir, alé savoir pou kosa, èl téi amenn avèk èl in gro balo, èl téi mète dsi son tète pou pa fé rokonète aèl. El noré pi mète in mask mé dann tan-la mask l’avé poin é lo madam l’avé mazine port in gro balo dsi son tète. Si tèlman désèrtin moun l’avé fine bite avèk èl lo soir mé san rokonète vréman kisa l’été. Par l’fète, kisa l’avé déza vi aèl pasé konm mi di san rokonète ? Dabor l’avé in sèrtin La Kastrol épi son méyèr l’ènmi L’arozèz. Dé boug-la téi pass tazantan kinz zour dovan la boutik a boir, ro boir é ro boir ankor. Défoi a bataye galman. Kisa ankor ? Bin ! Moin la di azot « Ary pate tort » l’avé bite avèk èl lo soir apré lo katéshis é sé dopi zour-la ké tout lo kartyé téi viv dann la pèr : la pèr lo fanm san tète é tout sak lété riskab k’i fé azot.
Kriké ! Kraké ! Kriké Mésyé ! Kraké Madam !

Mé an parmi lo pli an kolèr dann bann grann pèrsone lété lo papa Ary Pat tort pars li téi konpran pa pou kosa la fé sa son garson, in pov marmaye lo pyé l’avé rèss tort avèk la polio épi la tète in drol grosèr par raport lo kor. Donk in drol prozé la mète dann son tète : li téi vé obsoliman fou in koréksyon lo fanm san tète. Dann son kèr li téi di : « Aou fam san tète soidizan, si mi yinbou anpogn aou par out kolé, sansa par lo o d’out palto, avèk mon nèrf bèf é mon fors pèrsonèl, mi pé dir aou ou va santi kosa k’sé kosasa ! ». Pétète pa pou tyé, mé lo papa d’Ary téi vé donn fanm-la son doz pou fé arète ali fé pèr demoun dann l’androi épi sirtou pou la pène li la fé pèr son pti garson.
Dopi zour-la in somenn de ran papa Ary la marshé mèm. Li la rodé é rodé é rodé mèm avèk léspoir tonm dsi lo monstré fanm soidizan san tète. Tout bann nuit gramoun-la la marshé avèk lidé k’inn nuite li va fini par mète la min dsi lo mon stré.L’èr-la… ziska k’in zour son madam la vni oir la diréktris lékol pou rakont sak l’apré spassé dann son ménaz é rakont koman lé shoz téi tourn pa ron.

Sizyèm morso la fini-samdi proshin nou va oir lo sétyèm.