Oté

Zistoir Tizan avèk lo Fanm san tète-promyé morso...

Justin / 30 novanm 2019

JPEG - 43.6 ko

Zot I koné, dann tan moin lété marmaye é suivan la sézon l’avé dé shoz téi fé pèr anou é nou té toultan apré domandé kèl tablatir i sava tonm dsi nou, bann ti, bann pov, bann san protéksyon. An parmi bann zafèr-la l’avé zistoir Fanm san tète. Mèm zordi kan mi mazine sa Fanm san tète-la, mon dan i klak, mon manm – bra épi zanm - i mète a tranblé konmsi pou bate amoin atèr. Fanm san tète, mi pé dir aou, ou la fé pèr anou souvan défoi étan marmaye par raport lo ménas ou té i fé pèz dsi nou.
L’avé inn foi pou inn bone foi mésyé lo foi la manz son foi èk in grinnsèl !

Donk moin t’apré komans rakont azot listoir Fanm san tète, listoir fanm san tète avèk Ti-zan. Par l’fète lo fanm san tète sa lété pa in mazigador i ariv toultan, mé inn foi rant rant épi sirtou kan la sézon la fré i ariv é kan lo zour i lav son pyé bonèr pou li tonm dan la nuite… Pti-Zan pou son par l’avé pankor vi Fanm-la, d’apré sak li di, pa in sèl foi, é d’apré la lézann kan ou néna léspri for ou i oi pa èl zamé. Kan ou néna léspri for, ou i oi pa li émi pé dir azot pars moin la frékant ali, tizan l’avé léspri for. Défoi moin té a d’mand é si Lo fanm san tète l’avé poin la krintiv Tizan, pars kan lo pti marmaye té la, èl téi prézant pa é sito ké li té pi la, ala èl té i ariv pou fé pèr anou é mi pé dir azot la pa arienk in foi mon ki la moul poiv av èk modi fanm san tète la.

Astèr kan mi di azot in moun néna léspri for i éloign Fanm san tète sé pars mon granmèr l’avé di amoin sa souvan défoi pars d’apré sak mi rapèl si Pti-Zan la gingn la krintiv souvan dé foi, i paré li la zamé boir lo dsèl pou kalm son pèr. Li la mèm zamé vol ti boutèye lo bénite son gran-mèr pou protèz ali kont léspri Satan. Donk si ni vé in prèv lo pti marmaye l’av léspri for ala li la é zot la la pa bézoin rode midi a katorzèr, lo pou avèk lo lant dann la tète la poin shové… Mi di pa kan l’avé loraz, kan koudvan téi ménas, kan mang téi grinn partou kan lo shien téi irl konm lo lou, é kan son gramoun téi anvoy ali la boutik pou ashté in pti miské la rak pars li l’avé la krintiv alé par li mèm ébin Tizan téi sava, désidé, san pèr ni roprosh. Donk pti marmaye-la lété in marmaye kalou prèss san pèr. Akoz mi di prèss ? Pars kan l’avé loraz li téi pass pa zamé dsou pyé d’boi, é kan zéklèr téi grinn do fé, kan loraz téi moud mayi dann syèl, l’èrla Pti zan téi sif in pé for pou bien amontr li l’avé pa pèr, sansa pou fé konmsi.

Astèr si mi di azot Pti zan l’avé pa pèr lo fanm san tète é li mèm téi di lo fanm alé fé oir ali pars li l’avé pa pèr aèl. Si ou la zoué koud’pyé bourant avèk Grandyab ou i pé pa an avoir pèr in sinp fanm san tète ? Mé si tizan l’avé pa pèr aèl, lété pa nout ka : lété pa rar an parlan par réspé nout téi moud poiv é zoliman. Mi pé dir nout tout lété konmsa é nou l’avé poin la ont di sof sak lé in pé mantèr mantèr, mé a oir azot lo soir kan Fanm-san tète lété signalé in pé partou ébin té pa posib zot l’avé pa pèr. Kan ou lé blèm konmsa ! Kan out dan i fé kalak-kalak, kan ou i tran m dsi la zanm sinploman pars inn la di, ti dousman : « Antansyon fanm san tète ! »I pé pa di ou l’avé poin la krintiv.I pé pa di ou l’avé pa pèr.
Zistoir la pankor fini-Promyé morso a fini-dézyèm morso sé pou byinto.