Oté

Zistoir tizan épi zoizo la vyèrz - dézyèm morso…pou done anou in doz l’imanité an plis-sa i fèr ar pa nou d’tor.

Justin / 29 zwin 2019

JPEG - 43.6 ko

L’avé inn foi pou inn bone foi mésyé lo foi la manz son foi avèk in grinn sèl.
Samdi pasé moin la rakont aozt zistoir Ti-Zan épi zoizo la vyèrz : koman moin la trouv sa, ousa moin la trouv sa, koman moin la rode lésplikasyon é koman moin la fini par trouvé. Pars kan ou i bite dsi in n’afèr ou i koné pa, i fo ou i sar rodé. Dabor ou domann demoun é si zot i ariv pad one aou lésplikasyon, ou i sava rode sa dsu l’interner.si ou i trouv lé bon. Si ou i trou pa ou i mète sa dann in pti kon out mazinasyon é lé posib si la pa zordi domin, si la pa domina pré do mi n mé ou i fini par trouv sak ou l’apré rodé : dizon la klé l’énigme.
Kriké ! Kraké ! Kriké Mésyé ! Kraké madam !

Donk mi di azot, moin la anvoye in mésaz demoun mi koné noré pu done amoin lésplikasyon k’i fo pars sa in bann zamouré nout patrimoine épi d’inn sèrtène fason mon bann mètr pou pansé, pou rofléshi, pou kalkilé.. An parmi moin la késtyone in profésèr a distans pars apré moin la aprann li lété laba dann l’Inn . Konm kado li la anvoye pou moin in gayar foto in pti zoizo an ékilib dsi inn bransh an v . Lété pa zoizo la vyèz mé téi rosanm in pé. Moin la romèrsyé ali pou la foto.
Kan moin la trouv la solisyon lo problèm, moin la anvoye pou li é ou d’ot, sé sak zott la lir samdi pasé dann zournal. L’èr-la li la rakont amoin in zistoir, mi pans i arzout ankor kékshoz avèk listoir Tizan épi zoizo la vyèrz. Li la rakont amoin in tan li téi marsh in bonpé dann la foré é li la fé la rankont in zoizo la vyèrz : téi suiv ali, téi éloign, té i vien koté li é mèm défoi li l’avé konm linprésyon téi sava poz dsi son zépol.
Toudinkou lo zoizo la disparète é li la désid alé dann boi pou oir ousa lo zoizo téi sava.L’av é santyé dann boi é li la suiv lo bann santyé o azar . Pi d ’zoizo ; ziska k’in moman doné li l’ariv dovan in ranpar. Zis an fas dé li, lo zoli zoizo, kosté avèk son n i inn boté inkroiyab.. Lété lo ni zoizo la vyèz téi vé p pèrsone i débisk. Li la rotourn dsi son pa, pars li l’avé pèr in mal fondé i suiv son pa épi i tonm dsi lo ni lo zoli zoizo, pétète pou tiré, pétète pou shaboul kou d’galé pars kan ou lé mal fondé ou lé mal fondé.
Dopi l’èrla moin la gingn plizyèr mésaz d’ot moun mi aprésyé bien. Moin la mèm diskite avèk inn dé épi lo lézann zoizo la vyèrz la komans aparète pou moin, pi konm in lézann, mé konm in zistoir an vré._-si la pa vré antouléka vrésanblab, konm kékshoz lé fé pou done anou in doz l’imanité an plis. Normal ! Sé lo zoizo la vyèrz é sirman li amenn avèk li désèrtènn kalité banna i rokoné la vyèrz Marie l’avé.
Médam é mésyé, la sosyété, si l’ariv azot konète do pré in zoizo la vyèrz sansa in koup zoizo la vyèrz zot i pé rakont sa, an priorité pou zot zanfan sansa zot ti zanfan é dsi l’internet pou tout sak i yèm bann zistoir é bann lézann konmsa.

Si zistoir lé vré li lé vré. Si zistoir lé mantèr, la pa moin l’otèr. Koton mayi i koul, rosh i flote é mésyé lo foi i kontinyé kriye dann la nuite : Rann amoin mon fo, rann amoin mon foi