Oté

Zistoir Tizan épi zoizo la vyèrz (promyé morso)… pou done anou in doz l’imanité an plis-sa i fé arpa d’ tor pèrsone

Justin / 22 zwin 2019

JPEG - 43.6 ko

Si ni mète in pé par koté la politik, mi èmré rakont azot in pti zistoir : zistoir in pti zoizo. Koman li apèl ? Li apèl zoizo la vyèrz. Tazantan i apèl ali Chakwat si i baz dsi son fason shanté. Donkalor, figir azot moin té apré rogard fèye apré fèy in liv bann zotèr l’apèl ali « le guide naturalist » : mi di rogard plito ké lir, pars néna zoli-zoli foto dedan é lo bann ti modékri na poin réèlman pou fatigué.
Donk mi tonm dsi in zoli zoizo-an fète dsi dë zoli zoizo inn sé lo mal épi l’ot sé la fémèl, pars lo mal épi fémèl lé pa parèye san pour san, mé zot i viv kaziman a dë - an koupl si zot i vé. Lo bann zoizo i di zoizo la sa lé « andémik » épi protézé mé li lé pa dann danzé pou disparète. Pou kosa ? Pars parétil néna par-la sinkant mil isi La Rényoni.I paré sa sé in bonpé dann in pti péi konm la n’ote. Pou kosa li si nonbré ké sa ? Pars d’apré lo bann moun la fé lo liv li néna in gran téritoir pou li viv dosi épi…pars li lé protézé par la lézann « Ti zan ».
Kriké ! Kraké ! Kraké Mésyé ! Kraké madam !

Ala in n’afèr lé intérésan pou moin pars Ti-zan mi koné ali : mi koné Ti-Zan langouti rouz, mi koné galman « la fèss an or » épi inn-dé zistoir bann zansien la rakont amoin. Mé la lézann Ti-zan épi zoizo la vyèrz, sète-la mi koné pa. Kan ou i koné pa, ou i domann demoun épi ou i rod-rod in pé dsi l’internet. Ala mi komans par lans in apèl o sokour demoun mi koné i yèm La Rényon, i yèm lo patrimoine, épi zot lé kaziman mon bann mètr-a – pansé. Malorozman sé la nuite é mi mazine zot l’apré dormi. Donk mi rode ankor dsi l’internet e mi tonm dsi in kozman la SEOR-in l’asosyasion i okip bann zoizo.L’èrla mi aprann in kékshoz bien intérésan.

Ala kosa mi aprann :
I paré Tizan la parti dann la foré pou poz la kol pou trap zoizo. Domaz ! Mé sa lété dann tan l’avé in gran kantité zoizo isi La Rényon. In néstan li la fine trap in bon kantité zoizo, mète sa dann son tant kouvèrt é kan li sèye trap zoizo la vyèrz la pa lo mèm problèm pars li gingn pa, é anplis afors lo zoizo i tourn ali li fini par pèrd shomin. Li rode, li rode é li trouv pa in moiyin pou sort dann foré-la. Li kriy la vyèrz o sékour. Li di : « Ma tré bone vyèrz, ède amoin sort dan la foré siouplé ! Solèye apré lav son pyé é mi oi pa koman mi sava sort la ! ». La vyèrz i di ali : « Lé bon Tizan, m’a ède aou sort dan l’anbara la, mé a inn kondisyon : ou i rolash tout zoizo-la dann la foré. »
Tizan i di oui ! Kosa ou i sava di dann in ka konmsa ?
Donk li larg lo bann zoizo é la vyèrz i done lé z’ord son prop zoizo, zoizo la vyèrz pou tir lo marmaye dann l’anbara. In néstan zoizo la vyèrz i tir Tizan dann traka, i amenn ali dann in shomin li koné bien. Ala parétil la lézann Tizan épi zoizo la vyèrz. Alala pou kosa bann moun la fé liv moin la mark an-o la, i di ti zoizo la lé protézé par la lézann tizan.

Si zistoir lé vré, lé vré ! si zistoir lé mantèr la pa moin lotèr ! si sé in zoli listoir, tanmyé ! Si li la sèrv in n’afèr tanmyé an touléka. Koton mayi i koul, rosh i flote ! L’avé inn foi pou inn bone foi mésyé lo foi lamanz son foi avèk in grinnsèl.
Zistoir la pankor fini.