Oté

Zistoir Tizan - Gran dyab : « La fèss an or » - promyé bout

Justin / 17 novanm 2018

JPEG - 43.6 ko

L’avé inn foi pou inn bone foi, mésyé lo foi, la manz son foi avèk in grinn sèl !
I prétan dir tizan l’avé in sèr é d’apré sak in pé la di amoin son sèr téi apèl Tizane. Mé si Tizan lé sinp, Tizane lé plito orgéyèz. El i vé pa maryé avék pèrsone : prézant aèl inn, èl i vé pa ! Prézant aèl in n’ot, èl i vé pa non pli ! Si tèlman in zour son momon avèk son papa lété fatigé avèk èl. La fini par dir aèl :
« Tizane mon zanfan, kosa ou néna ? Kosa l’ariv aou ? Ou la fine trap out dé foi dé zan é ou lé ankor sélibatèr. Si i kontinyé konmsa, nou va shèrs in garson é ou i vé ou i vé pa, nou va maryé aou. Ou lé asé gran pou konprann in moun i fé pa in vi konmsa. I amenn pa in vi initil konmsa ! »
Tizane i réponn pa, é konm èl i vé pa maryé, èl i pans dann son kèr :
« I fo mi trouv in n’afèr inposib, konmsa mon famiy va lèss amoin trankil. Alé dormi don ! Moin lé pa bien konm mi lé koméla. Néna poin pèrsone pou komann amoin, mi manz, mi boir, mi promène dann boi, épi tout zanimo lé kamarad avèk moin, tout plant i fé z’ot zoli pou moin. »
Donkalor Tizane i kalkil, i kalkil mèm, somèye li gingn pi, épi in zour, èl i fini par dir avèk son famiy :
« Momon, papa, mi di pa zot mi vé pa maryé moin. Mi vé maryé mèm moin ! Mé si posib avèk in moun mon shoi, néna la fèss an or ! »
Lo momon i fé in gran sign do kroi, mé lo papa – zot I koné bann papa souvan dé foi, sa lé tro koul avèk z’ot fiy, lé fèb, fèb mèm ! Lo momon konm sa lé kroizé avèk gèp i s ’anfou pa mal drèss avèk z’ot fiy. Mi foutré atoué d’mari la fèss an or moin ! Mé final de kont èl i tonm dakor avèk son mari pou lèss son fiyé fé son kat fantézi.
Zot i di avèk Tizane : « Dakor Tizane, rode aou out mari la fèss an or, mé rode vite pars ni vé pa-ni pé pa, ou i konpran !-atann san sète an pou out maryaz. »
El i di avèk Tizan, son frèr, rode in pé fèye rakète torti, épi rode zépine galman, épi lank rakète mir épi mark dsi lo bann fèye : « Tizane i rode in mari, é tout sak i vé maryé avèk èl, alé koz avèk son famiy. Solman i fo li néna la fèss an or-In démonstrasyon sar obligatoir. »
Kriké ! Kraké ! Kriké mésyé ! Kraké Madam ! Zistoir la pankor fini-Biensir vi k’li vienn komansé - mi rovien san pèrd lo tan pou rakont azot la suit lo zistoir. 

(La pankor fini)