Oté

Zistoir Tizan-Grandyab : la fèss an or-dézyèm boute

Justin / 24 novanm 2018

JPEG - 43.6 ko

Tizane la sèr Tizan i vé maryé avèk in onm néna la fèss an or. Par l’fète èl i vé pa maryé pou vréman mé èl i pans si i trouv pa son lidéal son famiy va lèss ali trankil san maryé. Mé vi koné dan la vi, i koné zamé. Kan ou i pans ou va trouvé, alé oir vi trouv pa é kan ou i pans ou i trouv ar pa so kou isi ou i trouv.

L’avé inn foi pou inn bone foi, mésyé lo foi la manz son foi avèk in grinn sèl.
Ala ké bann prétandan pou maryé i vien rann vizit la famiy Tizan pou fé z’ot domann . Mé zot domann i abouti pa pars na poin inn dan la bann néna la fèss an or. Fors a fors bann prétandan i ronons pars in moun néna la fèss an or, sa i égzis pa. Mé antansyon, sète afèr-la i fini par tonm dann zorèye la famiy Grandyab é zistoman dann famiy-la néna in garson lé pa maryé. Donk son famiy i di ali : « I fo ou i fé out domann out tour, pétète ou va gingné landroi tou lé zot la pa gingné. »
. Mé garson Grandyanb i di : « Papa, momon, moin na poin la fèss an or é anpliské sa moin néna in ké konm tout famiy Grandyab .
- Arien son famiy i di ali, nou va trouv in tik-tak pou fé gingn aou in fèss an or. »
Ala ké bann Grandyab i komann in plak doré pou lo fis Grandyab mète dann son pantalon. La fine fé, astèr garson grandyab i sava la kaz la famiy Tizan pou fé son zonètté é an mèm tan domann Tizane an maryaz.
Kan li ariv la kaz Tizan, li déklar li la vni pou maryé avèk Tizane. La Famiy i rosoi ali, i amenn ali déryèr in paravan é i di ali tir son kilote pou oir si li néna vréman la fèss an or. Li néna vréman la fèss an or é la famiy Tizan i done zot fiy lo nouvo véni an maryaz.

Kriké ! Kraké ! Kriké Mésyé ! Kraké Madam !
Ala ké lo famiy i désid fé lo maryaz é Tizane, èl mèm, i pé pa rofiz lo maryaz pars sé èl té i vé in n’afèr konmsa. El i di son papa avèk son momon èl lé dakor pou maryé . Tizan pou son par i trouv sa drol : koman in moun i pé an avoir la fèss an or mé kan li vé poz késtyon son sèr i foute ali in boush ta gèl. El i di :
« Frèr mon frèr, ou na poin la parol la-dan, sé moin k’i maryé, sé pa ou, é papa avèk momon la fine aksèp mon fiyansé é prèv a konviksyon, li néna bien in fèss an or. »
Tizan i kraz son banane pars si li la poin la parol li tak son baro é la suit va oir apré.. Kan Tizan i domann ousa i lé lo paran lo fyansé lo ga i réponn tout son famiy la fine mor é li lé tousèl o mond. Donk li lé tousèl é lo famiy tizan i roganiz in pti maryaz an vitèss . Zot i konpran la pa bézoin rényonn famiy é tout sak i s’ansui. Maryaz fine fé : tizane i maryé avèk garson grandyab é tiza sé lo bofrèr lo dyab.
Koton mayi i koul, rosh i flote, l’acvé inn foi pou inn bone foi mésyé lo foi la manz son foi èk in grinn sèl.

(dézyèm boute la fini-troizyèm va vni samdi proshin)