Tizan i rann ali kont son sèr Tizane la maryé avèk in dyab. Li sava di son sèr mé sète-la lé si tèlman orgéyèz, pou pa rokonète èl la tronpé, i ménas son pti frèr fé bate ali par son bofrèr. Mé Lo pti marmaye i kontant pa dsa, li désid alé rolans son sèr.
L’avé inn foi, pou inn bone foi, mésyé lo foi la manz son foi avèk in grinn-sèl.

Tout la zourné Tizane i brout mèm pou nétoiye lo gran mézon é Tizan i fé son méyèr posib pou ède son sèr. Si tèlman sète-la i fini par rogrète lo bandaz li la fé avèk son pti frèr. Sète la lé malin, li konpran son sèr l’apré shanj zimèr é li rolans son kozman lo matin. Li di :
« Ma sèr, ma sèr, moin la di aou in n’afèr gran matin é ou la ménas fé tap amoin par bofrèr. Moin la mète aou solman an gard pars ou lé riskab mète out vi an danzé konm la myène galman.
- lo sèr i arkomans kriyé. El i di : « Ou i vé mi rakont out mansonjri mon mari ? Si mi fé sa, mi prévien aou ou va gingn malèr »... Mé Tizan i di sinploman :
« Ma sèr, alon fé in n’afèr, si sak mi di lé pa vré mi artourn nout mézon mé si lé vré aou de oir. Mi sava trèss in kord. M’amar sa avèk out gro doi d’pyé é kan lo bann Dyab v’arivé-si zot i ariv-mi ral dési pou fé lèv aou. ». La sèr i di oui é oila koman lé shoz la spassé.
Kan Tizane la fine gingn somèye, garson Grandyab i lèv épi li rouv la port ti dousman. Dé z’ot dyab i rant dan lo kaz é zot i sava koté l’androi d’li Tizane i dor. Zot i aprosh, i aprosh é Tizan i avèye, li dor pa. In kou sèk li ral lo fisèl ; lo sokous i fé lèv son sèr. Sète-la i oi lo bann dyab apré dans otour d’lo li apré di :
« Lé gra, la pankor gra, domin sar gra é nou va manz ali ! »
Kriké ! Kraké ! Kriké mésyé ! Kraké madam !

Tizane sé d’mète a kriyé, bann dyab loumaye. Solman lo mari i rèss la é li di : « Mon épouz, mon épouz, kosa l’ariv aou pou kriyé, ou la fé in mové rèv, sansa kosa ? ». Tizane i di : « arien ! arien ! la pa riv arien é èl i fé sanblan dormi. »
Landomin garson Grandyab i sava travaye é Tizane avèk Tizan lé tousèl dan la kaz. Lo sèr i dmann son frèr kosa i fo fé pars èl la bien konpri bann dyab-la i sava manz aèl épi son frèr aprésa.
Tizan i di : « Ma sèr, lèss amoin kalkilé. Dopi komansman mi koné ou la pa maryé avèk in moun é ou la maryé avèk in dyab. Lèss m’a rofléshi pou trouv in bon tik-tak pou not dé ! »
Koton Mayi i koul ! Rosh i flote ! L’avé inn foi pou inn bone foi mésyé lo foi la manz son foi èk in grinnsèl !
(Katriyèm bout la fini, sinkyèm i tard pa arivé – ziska samdi proshin)