Dann troizyèm morso nou la vi koman par in sinp présyon dsi son léstoma, Tizane la sèr Tizan la nyabou ranvoye lo grandyab dsi in plas vide dann marshé forin. Bann forin la anmar Grandyab avèk zot kord : kisoi zot kord koshon, kisoi z’ot kord bèf, kisoi zot kord panyé shoushou, kisoi zot kord pou anmar tout zot bataklan. Grandyab trapé, grandyab anmaré, Grandyab i gingn pi bouzé.
L’avé inn foi pou inn bone foi, mésyé lo foi la manz son foi avèk in grinnsèl.

Demoun la foulé pou oir lo grandyab. Kosa ? Sé li lo grandyab, So léspès monstré san kouraz, san boté, dann l’inposibilité pou fé pèr d’moun. Akoz nou l’avé pèr d’li konmsa. Lo moun, d’apré sak kélk’in la di amoin lété paré pou bate mayi lo dyab, pétète mèm tyé ali si zot néna lo moiyin. In pé kla pèr ankor, mé la plipar la pi pèr ali. Lo krintiv la sort dann son tète.
L’èrla, Tizane i done lé zord. Sak néna baton i pran son baton ! Sak néna doboi I pran son boi é paré pou tap lo monstré. Antansyon solman : tap pa dsi la kord pars kord va kasé é lo dyab va shape... Bibanbanm, bibabanm ! bibabanm ! bibabanm ! Lo dyab I souplègn : Pi kapab ! Pi kapab ! Larg amoin siouplé ! Larg amoin ! Bann lo zonm-la I tap I tap I tap mèm. Lo dyab I souplègn, I souplègn I souplègn mèm.
Momandoné néna inn la tap dsi la kord. La kord la kasé, lo dyab la vol dan lé z’èr konm in balon k’I dégonf. An irlan li la pass par dsi lo vilaz épi li la disparate par dsi l’orizon.
Kriké ! Kraké ! Kriké mésyé ! Kraké madam !

I paré dopi tan-la Grandyab la pi vni ditou dann fon l’ilète, kisoi lo zour, kisoi la nuite, kisoi dann pèryod zavan, kisoi mèm lo zour la fète bann gran dyab. Li la pi vni ditou é demoun l’arète an avoir la krintiv Grandyab kisoi bann gran moun, kisoi bann ti moun, kisoi bann garson, kisoi bann fiy. I paré dann vilaz-la, zordi demoun la pi pèr grandyab é kan i di pi pèr, lé vré pou vréman.
Si zistoir lé mantèr la pa moin lotèr, koton mayi i koul , rosh i flote.

Zistoir la fini é mi éspèr zot osi zot la pi pèr lo dyab.zot na pi la krintiv dé li. Pars final de kont in mové moun lé pli mové k’in dyab é ni koné néna mové moun. Mové dyab, ni koné pa si néna. An touléka si néna mi rapèl pi lo zour moin la vi inn kansréti an pijama.