Médam, zé Méssyé, la sosyété, koz èk mwin sé koz èk in kouyon, mé sé o pyé d’lo mir k’i oi lo masson. Mézami mwin la rakont azot in zour kozman in gran méssyé i apèl Christian Barat la di anou la vèye la rantré l’iLa(institut de Linguistique et d’anthropologie). Nou lété son bann moun téi fé lékol son band zétidyan. Mi pé ardi sa pars in kozman konmsa i viéyi pa zamé. Donk li la di anou : dsi la tèr toute demoun néna shakinn son talan é talan-la i mérite lo réspé. Pou mon par sa la inprésyone amwin. Sa la inprésyone lo moun normal mi pans mwin lé. Antand ali di sa, lété konmsi, aprésa, nou téi réspir myé, nou téi san anou myé, konm pli valab dan la sodsyété. Antouléka, sak li di lé vré, mé sak lé vré ossi sé ké shakinn i doi zète aprésyé suivan lo don li néna, suivan son prop talan : in poisson i grinp pa dsi pyé d’boi, li naz bien, é sé dsi son nazé k’i fo aprésyé ali. Si wi aprésyé ali dsi kékshoz li gingn pa fèr, pars li lé pa fé pou sa, ébin lé riskab li lé pèrdi dan la vi. Astèr mi poz azot in késtyon : nou lé nonbré dsi la tèr, nou lé nonbré La Rényon. Néna sak la sosyété i mète anlèr, é néna sak li mète pli ba ébin dann lo pli ba - mèm lo pli ba l’lo pli ba-zot i panss pa néna demoun valab la-dan ? Rofléshi azot bien. Mi souète zot i trouv la réponss é an atandan ni artrouv pli d’van. Sipétadyé.

« Ziz pa in poisson dsi son kapab grinp anlèr pyé d’boi. » : Mwin la tir kozman-la dann in fraz, in gran méssyé i apèl Albert Einstein la di.