Landomin kan bande zoinalist la rakonte sak l’avé éspassé dann la konf do press zot lété ankor étoné é sé konmsa ké zot la ésplike l’afèr : soi la fin d’kanpagn lété konu an mèm tan ke sak lété i doi z’ète élu, mé in pé la lèss antande Paul Vergès lété in pé dann lo vir-vir so zour-la. Finalman zot la fé déssèrtin kont-randu pou kass dossik dsi lo do lo gran z’anssien.

D’apré zot, kèl sizé i pouvé z’ète pli grav k’in zélékssyon, pli zinportan k’in zélékssion ébin sizé-la lété sinploman lo dérèglomn klimatik. In nouvèl anonssé avan La franss é k’lété riskab boulvèrs la vi bande zumin dsu la tèr é sé sète l’arivé, alé oir bande zoinalist lété dann l’évènmanssyél, dann lo détaye plito ké dann in vag de fon téi sava boulvèrs la vi toute l’imanité é ni san son poi zordi. Mé an final dekonte shakinn néna son lobjéktivité é kan téi gingn kass dosik dsi lo do in kominiss ébin lokazyon lé tro bèl.

Pou kossa mi di sa ? Pars pliss lé shoz i shanj épliss zot lé parèye…

Vantredi, samdi, dimansh sète ané, l’avé la-ba Sint-Sizane in manifèstassion pou moboiliz demoune konte lo danzé pou l’anvironeman. Mé dopi samdi bande gran zoinalist la trouv zot laktyalité toksik sou la form lo trètman zordir dann la zone Bel Air. Bande marmaye lékol Sint-Sizane la plante in kantité pyé d’boi ? Sa i konte pou la po d’patate. In konférans linivèrsité avèk plizyèr santène pèrsone ? In détaye sa. Plizyèr milyé d’pèrsone pou marsh pou lanvoroneman sa i vo pa pliss k’in vingtène pèrsone apré s’plinde pou in problèm lokal.

Antanssyon, mi di pa pou bande la manifèsté sa lé pa inportan : mi panss mèm sa lé inportan pou zot mé sétaki i fé son shoi dann laktyalité — sétaki néna son lobjéktivité é kan ou néna lokazzyon pou manz la lène dsi lo do parti kominiss, i f opa manke sa — mèm si pou sa i fo fé lo shoi pou trète in laktyalité toksik ; sa téi vo pa in laktyalité toksik.

A bon antandèr, salu !

Justin