Oté

« Zoinn lé dé bout par l’milyé »

In kozman pou la rout

Justin / 15 zanvié 2020

JPEG - 43.6 ko

Mésyé, Médam, La Sosyété, koz èk moin sé koz èk in kouyon-mé sé o pyé d’lo mir k’i oi lo mason. Problèm néna dann Kozman zordi, sa in problèm sèryé. Pa arienk pou nou rényoné, mé pou dmoun in pé partou dsi la tèr. Pou koué mi di sa ? Pars dopi ké l’om modèrn l’aparète-homo sapiens, banna i apèl ali - son pli gro problèm lé pou ranpli son bouzaron. Sé par raport a sa ké li lé zordi sak li lé. Sé par raport a sa ké zordi ankor néna près in milyar d’moun la fain in pé partou dsi la tèr ? La pa ké nou la poin lo moiyin pou bate atèr lo problèm la fain, mé pars nou la touzour viv dann in sistèm linzistis k’i fé k’in pé-in minorité - néna touzour tro é d’ot – é sa i fé in takonn moun-pa z’asé. Sa lé vré pou in pé partou dsi la tèr, é sa lé vré pou nout ti péi. Alé oir si nou téi mète lé moiyin, néna lontan nou té fine bate la mizèr atèr. Alé ! Mi kite azot rofléshi la dsi é ni artrouv pli d’van. Sipétadyé !