Lavé in foi in papang kashièt dann kèr in pié d’boi avèk in bèl bout la viann dann son bèk. Lo shat, léstoma i grouy, l’apré kalkil koman trap bout la viann là. Li sèy anbète lo papang. Li di l’ot konmsa : « Papang, si out ramaz lé fantézi konm out plimaz, aou mèm lo roi zoizo ». Alé, anon fé in koud karaoké : rak in pé out gorz, épi shante in kou... dizon “shanson Sarko”.

Papang, an prékosion, la trap lo bout la viann èk son pate, épi la bien ramas sa sou son gingin. Aprésa, li gard lo malfondé d’shat, épi li di : « Oté spès vilin shat, ou di amoin shant konmsa lo bout la viann va tonbé épi ou va kapé. Hin ? Kossa ! Ou i vé tourn ankor in kou lo fime “lo korbo avèk lo ronar” ? Ou i koné pa sa i pass pi ! Ou i pran amoin pou in zoizo déor ? ».

Sa i fé mazine amoin méssié Jégo. So boug-là i kroi vréman nou la tié kouyon pou pran son plas : Yèr o soir, moin la antann ali réponn Huguette Bello, épi dir li nana dé san soisante milion l’éro pou aranz bann éstasion nétoiyaz delo : soisante milion konm sibvansion, épi dé san milion anprété avèk la bank. Dakor, mé sa i shanj kossa sa ? Lo dé san million, kisa va ranboursé ? Bann konsomatèr d’lo ou sinonsa bann sharjèr d’lo ? Sa mèm bann mèr néna la krintiv, épi Jégo i koné sa li ! Soman li fé lo malin, mé konm di mon kamarad Zozèf, in zouar kart patanté : « Na in pé i rode fé lo ronar, i vien a bou fé lo korbo sinpleman ».

Méssié Jégo, si nana in zoizo déor, sé ou, sé pa nou. Nou, zoizo péi nou.

Justin