In zoizo, kan li poz atèr, sansa dann in pyé d’boi ou sinonsa dann in trou kap l’èr-la, mi pans li nana son baz, l’androi li sa rèr kékshoz pou diré. L’èr-la mèm ba, zoizo i pé fèr z’ot ni pou konsèrv l’éspès, si zot i vé bien. Mé kan li vol, sé pou alé rod manzé, sansa la paye pou fé son ni, li sré konm k’i diré an misyon. Astèr kosa nout kozman zordi i vé dir : i vé dir, si ou i poz pa ou par-la, ou la pa moiyin konstrui out l’avnir. Par ébzanp si ou i shanj plas travaye souvan, si ou i shanj madam ou bien mésyé, la pa ou pou fé in bon l’avnir pou ou. Ala, sanm pou moin sak nout kozman zordi i vé dir. Pétète pou zot sa i vé pa dir sa ? Donk, mi lès azot kass z’ot tèt la-dsi é ni rotrouv pli d’van.