Mi sort lir in kozman kamarad Paul Vergès la donn dann in zournal, kan li la gingn son l’az zot i koné. Dann son kozman li anparl bann moun té dann parti kominis épi la shanj shomin : mi di zot la shanj shomin pars zot l’abandone nout z’idé. Shakinn lé lib ! Oui konm pa. Pou kosa mi di sa ?

Pars na in kékshoz i apèl lo déterminis la klas sosyal é sa lé pa fasil shapé avèk in n’afèr konmsa . Dann zot gran mazorité, demoun i suiv léspri zot klas sosyal é mèm si zot i pans zot lé lib*, zot lé pa pou vréman. In patron, i suiv la olidarité bann patron ! In prolétèr i suiv la solidarité prolétèr ! In plantèr, li kol avèk léspri son bann kamarad. Pa solman késtyonn zintéré, mé késtyonn zidé, kiltir, konsyans konm i di sa.

Isi La Rényon nana dis pour san la popilasyon lé pli rish ké lé zot, sirtou pars zot lé fronksyonèr sansa zot i viv dsi bann transfèr larzan piblik. Donk, zot i pans zot na plis valèr ké lé zot, sé zot k’i fé viv lo péi, é si la pa zot, konm di lo kont na poinn salu… Antansyon, la pa in kasaz lé kui, sé in n’afèr, pou moins é in vérité vré.

Donk, pou anparl bann z’ansien la kite anou, sanm pou moin zot i i fé l’akostaj avèk zot klas. Na poin pou roproshé, solman pou konstaté é opir ou i kost avèk out klas, opir ou i mète in distans rant z’idé out parti épi ou. Mi arète tèr-la, mé mi pans i fo dévlop in pansé konm sak Paul Vergès la amors dann zournal pars dann fimyé zoli flèr i pous.

NB. In shanson ékri par aragon shanté par Jean Ferrat i di pa : « Zot té oi zot lib dsi in fil l’asyé, kant tout lékilib i suiv lo balansyé ! »