Lavé in foi, in vil, in gran vil dann tan-la. Vik lavé par-la san mil pèrsone épi nou lété dann kinzièm sièk. Lo komèrs té i marsh bien. Lindistri té vayan. Lo ladministrasion té kalou.Linivèrsité, baya ! Lété inn an parmi lo pli gran linivèrsité lavé dan tan-la. Bann savan, bann proféssèr lété ronomé : in pé partou téi invite azot pou fé z’ot konférans, pou sobatkozé, épi donn bon formasion-linformasion. Bann zétidian té isort z’ot péi pou alé étidié la-ba.
Dann vil-la lavé in tradision. Pou mon par, mi trouv sa in tradision éstra ! Kant in moun étranj té i ariv dann vil-la pou étidié, téi donne ali in bon landroi pou li rèsté épi li lé konm in sitoiyin d’onèr.
Kansa sa té i éspas ? Nou la fine di. Ousa sa téi éspas ? Sa té i éspas dann in vil i apèl Tombouctou, in vil l’Afrik, oussa demoun lé noir. Ousa lonèkté té in vré valèr.
Kossa La Frans i fé koméla ? Bann loi déssi lémigrasion, bann sant rétansion, bann lavion pou ranvoy demoun shé zot, épi bann kwasa-kwasa, rafl bann san-papié. Shakinn nana manièr viv li pé, mé fransh vérité : nana zoli manièr, épi nana galman vilin manièr. Manièr la Frans ofisièl koméla, pour sir sa in vilin manièr. Na artrouvé.

Justin