Koze èk mwin sé koze èk in kouyon, mé sé o pyé d’lo mir k’i oi lo masson. Mézami zot i koné dsi la tèrr é anparmi l’moun, néna sak néna zoli manyèr é sak néna vilin manyèr. Zordi mwin lé a d’mandé kèl sé lo rapor avèk lo santiman l’moun. Mwin lé ad’mandé si in moun néna zoli manyèr, sé in moun ké néna bon santiman. Osinonsa si li néna vilin manyèr li néna galman mové santiman. Lé sir si in moun néna zoli manyèr demoun lé paré pou done ali bon santiman, konm k’i diré done ali bondyé san konféssyon, é an kontrèr si li néna vilin manyèr, wi diré zamé o gran zamé ou i manjré in grinnsèl sanm li. Astèr si l’avé poinn rapor inn avèk l’ote : si lo manyèr i rolèvré pa sinploman d’in bon sansa d’in mové fasson d’viv an sosyété é si lo santiman lété pa sinploman lo fé d’avoir in bon sansa in mové fon. Si sé sa, la prézantasyon d’ ‘in moun i pé tronp aou : néna zoli manyèr mé kossa mi koné d’lo santiman ? Arien ditou ! é si lo vilin manyèr d’in moun sré tou sinploman i fasson pa fé oir son vré santiman. Afors tourné é rotourn l’afèr, mi apèrsoi mwin la pa avans in ta dann mon rofléksyon. Sé pou sa mi invite azot a rofléshir par zot mèm é ni artrouv pli d’van. Sipétadyé.