Mi koné pa si zot la vi, sansa si zot i ansouvien souvan dé foi, dann boutik shinoi l’avé inn-dé pti l’afish la vni jone a forstan li té kolé dsi lo mir. Dsi lo z’afish l’avé sak moin la mark an-o la, épi in n’ot l’afish avèk dé boug : inn mèg épi l’ot bien gra. Dsou lo mèg l’avé : li té i vann krédi ! Dsou lo gra l’avé : li téi vann kontan ! Sé sak demoun téi pans dann tan, épi té i ariv tanzantan k’in moun téi shanj boutik kan li téi doi tro. Pars, la boutik shinoi, krédi té la règ : kisoi krédi lo bon, kisoi krédi karné. Lo bann z’afish té i rès dsi lo mir é pèrsone téi fé pa in kont. A ! La boutik shinoi, i pé dir zot la rann sèrvis kréol ! Boutik shinoi, nout patrimoine. Li l’avé son plas rézèrvé dann la MCUR mé, i fo kroir, sa téi plé pa désèrtin. Alé ! Ni artrouv pli d’van sipétadyé !