Zordi i tonm la Fèt la mizik é, moin lé sir, konm shak ané, la mizik i sava donn paké in pé partou dan La Rényon. Bon zafèr, mové zafèr ? Mi antan déza in pé apré di, la mizik lo ta épi la mizik déor i intérès pa zot. Moin lé sir antann in pé apré di, kan ou i shoizi bien, ou i pé trouv in n’afèr lé a out gou. In pé va rant zot kaz an dizan zot i pans sa in pèrt d’tan. D’ot va di, rant zot la trouv in bon zafèr pou ékouté. Konm i di dan la lang fransèz, lo gou, lo koulèr, sa la poin pou diskité la dsi. Solman, si mi rapèl bien mon vyé profésèr fransé, li té i di, lo gou èk lo koulèr, sa sé in n’afèr k’i diskit pars li té i di anou touzour, nana lo bon gou èk lo mové gou, nana zoli koulèr épi koulèr an kouyon.

Moin lé sir zot i oi pa tro kèl koté mi dévir zordi. Kèl koté ? Bin m’a dir azot an gro an gro mon poinn vizé. Pou moin, la mizik, sa i fé parti la kiltir, sé mèm in gro bout la kiltir. Donk, konm nou lé isi La Rényon, mi oi in promyé zafèr i doi intérès anou, sé la kiltir rényonèz, é an parmi la mizik rényonèz. An parmi, mi préfèr bann mizik la akonpagn nout lite, épi la konkète nout lidantité : mi koné in bonpé group la zoué bann mizik-la é bien antandi mi pans banna an promyé. Mi obli pa kant mèm bann mizik lamizman, é an parmi bann mizik la rant dan lo gro sak nout patrimoine : bann ga konm Fourcade, Fossy, Alain Peter, Maxime Lahoppe, Madoré, sa i fo pa ni obli pars zot la anrishi nout partrimoine. Lé zot, sak mi aprésyé, va éskiz amoin pars moin la pa apré drès kabaré in diksyonèr mizikal. Zis bèk-bèk in pé an sirfas !

Aprésa, nana galman bann mizik i sort dann péi nout zansète. Lékèl ? La mizik fransèz bien sir, la mizik indyène galman, épi la mizik malgash, komor, shinoi, sa i fo pa ni gnor. I fo pa ni gnor non pli bann gran la mizik mondyal, é si pèrsone la pa rouv la port pou nou, bin i fo sé nou ki sava détak ali, konm sa la limyèr lé pa anfèrmé déor... Lé vré, moin na konm linprésyon i fé pa, isi, konm in pé partou léfor k’i fé pou dévlop nout kiltir mizikal. An parlan, zot i pans pa la MCUR l’avé in rol pou zoué la dan ? Yèr moin la anparl nout QI, é i paré nou lé pa tro gaté késtyonn sa. Moin la di kosa mi anpans : la bav krapo i sali pa lo zoli pizon ramyé. Mé sinploman, zot i pans pa la mizik sé in n’afèr i pé rann anou pli ouvèr, pli kiltivé, pli intélizan ? Moin mi pans ké oui.

Bone fèt la mizik toulmoun é tash moiyin trouv kékshoz pou rann zot vi pli gayar, épi pou fé pass azot in pé lo bon tan. Bone fèt zot tout !

 Justin