Matant Zélida la ékrir Justin :

Mon shèr nové, mon spès salté, si mi konpran bien zot i sort gingn zéléksyon la ? Touléka, sé sak pmoin la konprann kan moin la ntann zot portèr d’parol apré kozé. Pou moin, mi pans si zot la gagné sé in kou d’rès trankil ké zot la gagné. Aprésa, i pé touzour diskité dsi kisa la gingn lo pli gro kou d’rès trankil/kisa ? lo LPA, lo PLR, lo Parti sosyalis, o sinonsa lo parti kominis. Pars kisa la gagné ? Sé la droit, lé zot la sort ladan san shomiz san pantalon, konm Ratsimbazafi té i shant. Alé ! Pou fé ri, zot i fé ri é pou anshévé zot i di sa sèryèzman konm lé pa posib.M’a dir azot in n’afèr : « Alé pous kanar dan la désant don ! ». Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr, lé intérésan antann aou. Si ni kozé in pé sèryèzman ? Kosa i doi intérès demoun sanm pou nou ? Pou komansé demoun i pans na in bonpé problèm isi La Rényon, donk pou la plipar d’moun sé shèrch a konète si in zéléksyon i pé pèrmète trouv la solisyon pou bann problèm sansa i sèrv a rien, gingn in zéléksyon si avèk sa ou i pé pa trouv la solisyon bann problèm. Demoun i sar gingn la kaz sanm sa ? I sar gingn travay èk sa ? I sar konbat e la mizèr ék sa ? Mi pans ké non, é mi majine moin lé pa tousèl a pans konmsa !

Lo pli pir sé ké tout parti i pans la pa lo zéléksyon i sort pasé va donn anou lo bon solisyon. Pli pir, mèm la mazorité d’moun i kroi pa sa. La prèv ? Plis sinkant pour san d’moun la pa parti voté ! Donk zot i vé dir, i fo arète fé fèr anou dé shoz initil. Akoz alé voté si sé pou alé fé in « akte manké » konm goldmann i shant. L’èr-la, i fo bien konprann sa knout parti i di : sé toulmoun i diskite pou prépar nout l’avnir, si sé pa sa sé in pèrte tan. Zordi la plui é domin solèy : mi dout pan out pèp va fini par gagné. Tok ! Pran sa pou ou !