Dimansh soir dann Télé-Rényon, mi antann lo prézantatèr apré di : « Dipavali i donn paké Sintandré » épi li armète avèk : « Sète Sinpyèr la pankor komansé, mé l’apré préparé ». Dann mon kèr, mi pans i sava amontr in pé la Fète la Limyèr dann Sintandré, épi pétète apré va tourn in pti boute film déssi la préparasyon la fète dann la kapital di sid. Alé oir ou ! L’amontr aryink in pti sékans la préparasyon la fète la-ba, dann Sinpyèr, aryin pou Sintandré. Moin la rès in pé mavouz pars solon moin, — mé pétète mi tronp ! — Télé-Rényon lété apré suiv la lign Virapoullé, pa parl la fète Sintandré, pou fé in bèl bébète z’afèr déssi la fète Sinpyèr.
Solon zot, moin na rézon, sansa moin na tor ? Pétète a forstan, moin la fine nir frazil konm tronp la mor ?
Poitan, sak mi koné, é moin lé fine abityé ansanm, sé lo zanbèk Éréfo i mète toute sak do pré, ou byin do loin, nana in rolasyon avèk Parti kominis kan zot na l’okazyon, é pou azouté, sé avèk nout larzan k’i fé anou bann z’afèr konmsa... Shak foi, mi pans "na in zour i apèl domin", mé bann moun kom moin, bann moun mon parti, na poin assé la ène, ni léspri la vanzans dann kèr pou tir nout tar kan l’okazyon i prézante, si in zour èl i prézante.
Toute fasson, mi inkyète pa : si ou na rézon, in zour lo moun i donn aou rézoné, lo pèp i donn aou rézon... Lanspèk, sa sé in n’afèr ni koné. Dopi sinkantan, ni koné sa. Konm di lo kont : nou la konète manz nout lanmsime. Lo gou lanmsime* lé ankor dann nout boush é ni krash pa dsi. Si i fo, nou va manz ali ankor, mé ni koné — pa zordi, pa domin — nou va manz galman noute gato larouroute, noute paté kréol, épi toute bon z’afèr nana dann nout kiltir. Zordi la sansir, domin va fini par rokonète nout droi !

Justin

* Lanmsime : lo son mayi... an fransé nora di : "Nou la manz nout pin noir !". Dan la guèr, demoun pov lété ragoulé afors manz lanmsime, a la plas bon mayi.