Lo promié miniss la pran l’èr èk lo dépité Lurèl pou fé in rapor d’si l’égalité réèl. Li la komann lo rapor o-di-t-on sé pou in ratrapaz sak i mank a nou dopi 70 zan, plito sak i dwa a nou. Aforsstan kozé la d’si, nout tout i koné nou la zamé èt la otèr èk bann la franss késtyon galizé. La kantité d’zafèr ni tonm pa an ord èk banna ? Néna télman zordi dann lo rapor, lo dépité li mninm li propoz 35 rokomandasyon èk 75 propozysyon pou galizé.

An ratrapaz, li prétan dir, néna 25 kan pou fé, an mwin minm mi trouv 25 kan lé in pé long, èksak nou lé finn atann, tanto va fé 100, épisa mi di, pétèt pou désertin zafèr ni pé atann ankor mé pou in pé fo fé tou-d-suit. Argard sinploman d’si la shérté d’la vi, an plis sa in dominn i konsèrn nout tout.lé anndan lo rapor. Ni pé pran lélan la d’si, vik lo dépité i koné in rèyon i di. Sanm pou mwin d’si la shérté-d-la vi lo gouvérman i gingn déza aksyonn in dé lovié.

Promié lovié ? I pé déza goumant la rotrèt. Par égzanp d’si manshandiz, kontrol in pé lo pri, o lièrk lèss bann monopol son tousèl, antropran in pé pou la konkirans kiswa dann la kominikasyon, kiswa pou la mitièl, kiswa pou vwayazé, dot ankor. Sirtou argard byin si ant zot na pwin in lantann pou akord d’si lo pri, banna lé for pou sa. Néna télman pou fé, zordi i tonm i bon zour pou komansé, pou arkomanss dopi lo débi. Lo 19 mars !