Témoignages - Journal fondé le 5 mai 1944
par le Dr Raymond Vergès

Cliquez et soutenez la candidature des Chagossiens au Prix Nobel de la Paix

Lakey lo sit > Chroniques > Oté

Zordi nou té fine avoir lo trin é la rout sré an bone voi !

zedi 16 zwin 2016, sanm Justin

Matant Zélida la ékrir Justin :

Mon shèr nové, mon spès salté, rouj-de-fon dovan l’éternité, mi sort aprann in n’afèr moin lé sir ou épi out bann dalon la pa aprésyé sa ditou. Kosa i lé ? Bin oila, mésyé Didier Robert i sava gingn lo rosh pou fé la NRL. I kal aou la ! Akoz zot té i kroi k’in mank galé noré anpèsh fé la rout ; ousa li sava gingn galé solon vou, Li sava gingn sa avèk mésyé Jean-Paul. Lé bien kan la droit lé ini konm in vré famiy. Touléka, mi trouv lé bien moin é sé konmsa ké bann rouj de fon, la droit i rash z’ot dan. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr, étone pa ou si in foi anplis mi tonm pa dakor avèk ou. Lé vré ké pli sour ké lo sour sé sak i boush son z’orèy é sète zot lé bien mastiké par l’intèryèr.

Parl azot réshofman klimatik ! zot i antan pa. Parl azot dsi lo difikilté pou ranbours lo dépasman bidzé ! Zot i antan pa. Parl azot la mor posib lo bébé lagon lé latanier ! Zot lé pa la. Di azot kan nora ra d’maré sar pa posib pass par lo vyadik ! Zot i antan pa zorèy. Di azot l’erop lé pa kontan pars zot i fé pa lo train ! Kas pa la tète. Lo métod koué, ala in bon métod-la, i sifi d’dir : nou va fé la rout ! Nou va fé la rout ! Nou va fé la rout ! Apré sa la rout va fé tousèl !

An touléka, moin mi koné in n’afèr. Si l’avé aplik lo projé Vergès ébin non n’oré déza lo train é la rout litoral sré an bone vois an problèm l’arzan, san problèm la mèr ! San problèm galé vi ké lo galé pou fé lo train nora ansèrv pou la rout. Sé la diférans rant in moun gabyé é prévoiyan é in moun na grin poi dan la tèt Tok ! Pran sa pou ou !


Inn modékri, inn ti lavi, inn komantèr ?

signaler contenu


Facebook Twitter Linkedin Google plus