Tiké rouj pou Didier Robert.
La fédérasyon bann z’asosysion i ansèrv transpor piblik dan La Frans la pa byin aprésyé kan konsèy réjyonal la déside arète avèk lo tram-trin. Li la pa aprésyé galman lo rol gouvèrnman fransé la zoué dann z’afèr-la. Dann zot 17eme kongré zot la krétik désizyon-la pars pou zot sa lé dépitan afors ’ète vyé jé (*).

Kossa i fo anpans dé sa ?
Moin pèrsonèl, mi èm pa tro antann bann moun déor krétik anou. Moin na tandans pansé, nou lé myé plasé ké moun déor pou konète sak i fo pou nou, shé nou. Mé dan lo ka lo tram-train, séryèzman sé in mové désizyon ! Lo konsèy réjyonal na tor, gouvèrnman ossi. Épi,toulmoun i koné koméla sé dépi Paris k’i diriz la politik konsèy réjyonal, an sharète shaviré.
Par l’fète i égzis ossi in pri Pinokio, pou bann fo-dalon lo dévlopman dirab. Mi éspèr pa konsèy réjyonal, in zour i gingn rékonpans-la, mé mi krin pou li, afors li fé sak li fé. Alors, apré lo tiké rouj, domin lo pri Pinokio ?

Justin

(*) « décision d’un archaïsme navrant », "un choix rétrograde" selon la fédération nationale des usagers des transports(FNAUT)