Mi di azot sa pars i arsanm in pé la fine obliyé, pars mi antan azot malparl bann zémigré alor mi domann amwin kossa noute bann zansète zémigré la fé in pé. Mi domann si zot i anvé bann zafrikin pou toute sak zot la fé pou angrèss la tèr ni travaye. Mi domann galman si zot i anvé bann zindien l’aporte pou nou in gayar filozofi. Mi domann ossi si zot i reprosh bann chinoi pars banna la ède anou trape lé dé boute par l’milyé an atandan ni trape la koupe kann é ni gingn lo pèyeman. Mi domann kossa i reprosh bann malgash, komorien é lé zote é lé zote ankor… é bann zarab pou toute gayar linj zot l’amenn pou nou épi in kiltir épi in rolijyon.

Wala bann késtyon k’i vien dann mon tète shak foi mi antann noute bann konpatriyote — pa toute mé in pé — apré antreprann bann zémigré kan zot i débarke dsi noute tèr bienémé. Mi anve d’zot kan olèrk d’ète kontan zot i vien pou fèr in lantante avèk bann rényoné — avèk nou — zot i di banna i vé vol lo tite franssé pou trape bann préstassion… in si gran voiyaz épi in si dir voliyaz pou si pé d’shoz.

Astèr mi pé rapèl azot in kozman Paul Vergès kan li téi di zordi zémigré, domin Rényoné é konm mi di finalman, i vé, i vé pa, sé la kréolizassion va sorte vinkèr dann toussala.

A bon antandèr salu !

Justin