Mi koné pa a zot ; mé a moin, moin lé in pé perdi ék toute lo bann zour d fèt nana sé dernié tan ! Kalkil, la i dézà lo 20 fèt labolisyon, mardi 24, fèt, 25 désanm fèt tinoèl, samdi é dimans 28-29 ; i répèt mardi 31, fèt déziinm révéyion sokou si sé la sin silvest, promié d lan i fèt ankor ; déza tan ni artrouv nout sominn normal 7 zour, in zour i travay pa, lo dimans par egzanp .

Mé so mardi 31, koté d sinpol, léspas sitoyiin, bord mèr, navé in lévènman, mi koné pa si zot lasuiv laktialité ; le komité dlermitaz té i vé mark in kont a robour si la kestion « éradik la povreté dan lo monn avan 2015 ».
Sa in nafèr 180 sèf déta la signé an 2000 - laFrans avèk - or zot i koné koman la Rényon nana la mizèr plis kan Frans ! nou lé ankor pli konserné !
Mouvman Indignés 974,ATD Quart Monde,Amnesty International, la Banque Alimentaire de l’Océan Indien, lasosiasyon i okup nouri bann SDF le Port té la, Militan politik, AJFER, tout té la po témoigné zot lanvi mèt ansanm po kapartird zordu nou anlèv in zour… nu done ziska 31 désanm 2015 : 365X2=730 ; anon kont alanver :
730, 729, 728 ziska zéro ; nou vé sak zour nou fé in lévènman… koué nou la fé zordi po élimine la povreté, isi la Rényon ?

Nou lé dan in sosiété in pé (bokou) ipokrit : agard koman zordu dann périod fèt linsolans sak nana,gaspiyaz larzan, pétar, somon, kaviar, mouton antié tourné an méshoui, lalkol i sar koul a flo a koté bann moun pov lo minimome vital zot la poin po pas la zourné.
La sosiété minm lé fé po kiltiv légoism.
Zordi zourdlan, ier révéyion, zot la pans in pé sak i poura pa révéyioné ?

Justin