Mi rapèl in zour l’avé in sobatkoz dsu la popilassyon rényonèz é l’avé in kamarade la pran la parol é li la di, sak nout toute i di zordi é toulmoune lé dakor avèk. Donk li la anparl bande zapor éropéin, afrikin, malgash, zindien, shinoi, komor é d’ote é d’ote ankorla fé noute nassion kréol rényoné dann loséan indien..

Mé oila, dann tan-la l’avé in pé téi rode la ptite bète é zot té akiz — prossé d’lintanssion — anou diminyé l’apor éropéin épi son influanss. Si tèlman ké kan inn la pran la parol, li la di, li konstate inn foi an pliss ké déssèrtin i parl mèm pa bande zapor éropéin é li la amonte lo doi lo kamarade téi sorte anpârl la popilassyon rényonèz épi toute son zapor.

L’ote soir kan kamarade Elie la fé son konféranss li la bien di, i fo toute bande fors viv La Rényon i done zot poinnvizé pou ariv in akor rante toulmoune dossi in plan par bande rényoné pou bande rényoné. Li la anparl bande zélu, bande sindika, bande zassossiasion, bande koléktivité, épi bande sitoiyen sak néna dé shoz a dir.

Pli konssyanssyèl l’avé poin, mé néna in pé la antropran ali pars d’apré zot li téi vé fé in lassanblé avèk bande zélu an obliyan lo pèp alé oir lo pèp té pa ditou obliyé. Toute sak té la la bien antande sa, mé in pé la pa antande ditou é sé konmsa ké zot l’atake noute kamarade an vré sharjèr d’lo..

Souvan dé foi dann la radio wi antan in moune apré di in n’afèr li lé pa sir, mé li apiye la dsi pou fé toute in dévlopman avèk in gran kantité d’répétission : li la di toulézan néna 7000 pèrsone i sorte déor pou rante dann noute péi. Sa lé fo, toulmoune i koné lé fo, mé sa la ansèrv ali pou dévlope son lidé dsu la priorité i fo solon li done bande rézidan pou ashté lakaze.

Alor mézami, alon méfyé zorèye demoune. Na poin arien lé shoizirèr konmsa boudikont i fé dir a ou sak ou la pa di.

A bon antandèr, salu.

Justin