Kosa i ansèrv in port ? Li ansèrv pou rantré, li ansèrv pou sorti. Li pé anpèsh aou rantré é li pé anpèsh aou sorti. Donk la port i fé son polis par li-mèm : li fé in shoz, li fé son kontrèr. In foi li ansèrv kékshoz, in n’io foi si ansèrv pou fé lo kontrèr : li pé z’ète in rouvèrtir, li pé z’ète galman in fèrmtir. Astèr in zorèye kouk li an sèrv ? Lé vré li pèrmète aou antann dé shoz : in bruit, in nouvèl, in mizik. Mé si ni kalkil bien li ansèrv pa pou sa solman. I di pa : « zorèye koshon dann marmite poi ! ». Final de kont zorèye i antan sak li vé é i antan pa sak li vé pa. La pa lo zorèye li mèm, si zot i vé bien mé lo moun i manyé son zorèye konmsa. Alé ! Mi kite azot rofléshi la dsi é ni artrouv pli d’van. Sipétadyé !