Matant Zélida la ékrir Justin :
Mon shèr nové, mon spèss salté, moin lé a d’mandé pou kosa souvan défoi mi antann dann la boush bann rouj-de-fon lo mo « réspé » é biensir sé bann rouj - k’i réklam lo réspé. Mi domann amoin bien kosa lo réspé néna a fèr dann in bataye politik, sansa dann in lite éléktoral. I diré zot i mète la fote dsi lé zot si zot i pans néna poin réspé pou zot. Lo réspé, sa i mérite sa, é la pa la loi k’idéside si néna réspé pou ou sansa si na poin. Si néna sé kan ou la mérité, si na poin sé kan ou la pa mérité. Tok ! Pran sa pou toué !

Justin la fé pou répons :
Mon vyé matant k’i koz toultan la boush rouvèr i étone amoin ké ou i trouv drol ké nout parti i réklam lo réspé pars konm li réspèk lé zot, li pans lé normal k’an rotour lé zot néna réspé pou li. Mi rapèl bien sak in résponsab nout diréksyon téi i di néna kék moi an parlann zéléksyon : li dizé, néna inn sèl kondisyon pou rouv la diskisyon avèk lé zot sé ké lé zot i réspèkt anou konm nou ni répèk lé zot.
Réspékté ? Sé kan ou néna la konsidérasyon-dakor, sansa pa dakor-mé lo minimom sé lo réspé résiprok. Dabor lo réspé pou nout parti son bann dirizan épi son bann militan é sak nou la fé an soisantan, i zistifyé asé lo réspé ni réklam.
Réspékté ? Sé lo réspé pou bann désizyon nout parti i pran. Sé li k’i dézign demoun i doi anparl an son nom avèk lakor la mazorité bann kamarad. La pa ou k’i shoizi lo moun pou koz ansanm, sé lo parti k’i done lo nom la pèrsone i doi koz avèk ou si ou lé éktèryèr par raport nout parti.
Si néna poin réspé, ébin na poin la démokrasi, é si néna poin la démokrasi ni bate an aryèr par raport landroi nou la fine arivé… Dann in ka konmsa kèl i pé z’ète lo sanksyon ? Lo sanksyon sé kan ou i tir ou mèm in bal dann out pyé pars ou i réspèk pa nou é la plipar d’tan in bal dann pyé lé souvan dé foi vite arivé ..
NB Astèr si ou i vé pa diskité ébin sé in n’ot problèm sirtou i rézoud pa par lo déboshaj kamarad konm mi antann dir d’isi d’laba.