Mi pans, konm moin zot la romark lo gran tapaz la fé La Rényon dsi la késtyonn zéléksyon laba dann Maurice. Kaziman tou lé zour bann gran zournal la anparl sa. Kaziman tou lé zour sa la pass dann bann radyo épi bann télévizyon. Bann rézo sosyo téi débord arienk avèk sa.

Normal !
Normal ! Maurice la pa nout sèr an parmi bannzil loséan indien pou arien. Normal ! Pars laba néna in milyon troi san mil kréol konm nou, in lang, in kiltir kréol. Normal ! Pars bonpé rényoné i sava laba pou pass vakans. Pars kan lo pap la vni an tourné, bonpé rényoné la parti galman dann nout il sèr. Normal ! Banna i sort pa fé z’ot métro éksprèss. Normal ! An pliské sa, pou tout moun in pé sansé dann l’indyanoséani domin, ni vé, ni vé pa, nou va kolabor avèk péi-la. Donk lé normal i fé in bonpé dézord kan banna i vote !

Pa normal !
An réalité, la pa tro parl bann zéléksyon dann Maurice. Lé pétète mèm posib in bonpé rényoné I I koné pa kisa la gingn zéléksyon, pou fé kosa, é si sak i doi fé I konsèrn anou sansa I konsèrn pa… Poitan néna dé shoz inportan l’apré éspass laba sansa I sava éspass laba ! Mi pans zot I koné, mé m’a souf ankor in kou sa dann zot trou d’zorèye.

Si mi di azot « Shagos » ? Zot i koné Maurice lé konsèrné par sa . Si mi di azot Tromlin ? Sa i konsèrn Maurice sa, épi Madégaskar é d’ot ankor ? Si mi di azot la vizite lo pap, si mi anparl azot lo bann zé dé zil , lo métro éksprèss… Si mi di azot Agaléga ? Pé sfèr zot va dir amoin sa sé in zé danzéré ! Astèr si mi di azot néna in milyon trois an mil kréol konm nou laba, avèk in kiltir kréol konm nou néna inn. Si mi di azot si ni konsidèr nout l’avnir épi sète Maurice épi sète d’ot ankor lé angajé dann sid-ouest loséan indien lé posib zoté moin ni pans parèye. Pars lé rézonab pans konm ni pans.

Pétète zot va dir amoin noré falu bann télé, bann gran zournal i parl in pé so zéléksyon Maurice é nou téi doi pa fé konmsi arien n’été mé la pa promyé foi sa i ariv anou é sar pa la dèrnyèr foi. Ni rogard nout nonbri épi sak i éspass loin mèm, laba, dann l’érop. Pétète in zour nou va vir nout kiti é sar tan.

Nb - Par l’fète lo gagnan zéléksyon Maurice sé Pravind Jugnauth épi l’alyans morisiene mé pé sfèr sa i fé azot ni fré ni sho. Poitan sa i anpèsh ar pa moin dir azot si zot i koz konmsa zot na tor é tardra viendra zot va rann azot kont zot lérèr.