Mi koné pa si konm moin zot i suiv in pé a-titré sak i éspas dopi in bonpé d’zané dann bann péi konm l’Irak, La Syrie, La Libye, Lo Mali épi d’ot péi ankor. Mi koné pa si dopi, o-moins 1967 zot i suiv la késtyonn la Palestine. Mi koné pa non pli si zot la suiv sak i apèl la késtyon bann kurd. Touléka, mi pé dir azot sa in bann problèm mi suiv an fézan atansyon. Pars pou moin si na in guèr mondyal lé riskab pété èl va komans dann bann péi-la, sinonsa par raport in problèm v’ariv dann bann péi-la.

Mi pé pa dir azot ké mi konpran bien sak i ariv dann bann péi-la dépi in bon pé d’tan. Mèm, mi pé dir azot nana dé foi, konm toulmoun, mi konpran pa granshoz dann sak i éspas. Mi domann amoin si bann guèr-la sé in bann guèr la rolizyon konm dann tan avèk bann kroizad, osinonsa la guèr rant protéstan épi katolik. Mi domann amoin si sé in bann guèr la sivilizasyon konm l’arivé souvan dé foi. Si sé bann guèr idéilozik konm rant kominis épi kapitalis. Dé foi mi domann amoin si sé pa solman bann guèr ékonomik. Sansa si sé in bann z’aksyon absird : ou i shèrch lo motif épi ou i trouv pa.

Spandan mi romark kan bann péi oksidantal I anvoy z’ot l’armé pou fé la guèr dann bann péi-la, sak i rès kan zot i sèy partir sé in gran dézord, kaziman in kao : kao dann l’Irak, kao dann l’afghanistan, kao dan la ! Syrié, la libye, lo Mali épi dann d’ot péi ankor konm La somalie é la pa fini. Pli pir bann péi l’erop, bann pti shienn gard l’amérik apré avoir mète dézord dann bann péi, astèr i rosoi l’éfé rotour : é sé bann moun inosan k’i ramas bann bonb, bann mitrayète, bann kou d’kouto konm in boomerang k’i artourn l’androi li sort.