Pou kossa mi anparl azot de sa ? Sé pars néna vintan kan la pèst l’arivé néna in pé té kapab invante par koman maladi-la la déklaré épi la trape dé san sinkante mil pèrsone. Lo tèz lo pli aksépté par l’moune sé in moune lé mor dann bato é in médssin la monte a bor pou konstate lo déssé épi pou fé inndé prélèvman. Pou in kantité inkroiyab demoune sé konmsa ké la maladi l’ariv issi La Rényon é la répann partou.

Bin figuire azot in pé, mwin néna in vyé famiye la gingn la maladi l’ote kou la ébin li lé ankor vivan é li sorte anparl amwin lo mor dsi bato é lo médssin k’la parti a bor pou konstate lo déssé épi k’la fane la maladi partou La Rényon… Mi pé dir azot ankor mon famiye i kroi pa moustik tig pars kan li té pti bann gran maringouin d’apré sak li di la pike ali san fé gingn ali la maladi.

Si in maringouin i gingn pa done la maladi ziz pi in pti kouyapass konm lo moustik tig.

In késtyon mi poz azot : mwin la gingn lo shik néna vintan, d’apré zot mi pé argagn sa koméla. In médssin la di : zamé d’la vi. In n’ote la di : pétète bin k’ oui, pétète bin k’ non… Alor mi yèmré savoir si zot i kroi la syanss osinonsa si zot i kroi pa ? Pou mwin i fo la réponss i baz dsi in vré travaye syantifik avèk bann travaye pratik étsétéra. L’èrla mi kroi dan la syanss pars néna in bonpé zafèr èl i gingn éspliké. Mèm si mi konpran pa lésplikassion mi kroi dan la syanss.

Mi arète in kou la pou dir azot lé vré mon famiye kaziman ilétré i rakonte la kouyoniss mé a s’ki paré néna in Prézidan la pli grann puissanss mondyal i paré li kroi pa lo réshofman klimatik. I paré mèm li lé in pé aplatist… Li kroi la tèr lé plate é lé pa ron.

Késtyon : kèl diféranss rante in rényoné abriti konm mon famiye é in prézidan l’Amérik konm Trump ? Okin diféranss dsi lo poinnvizé d’la konéssans, mé antanssion, mon famiye lé mwin danzéré ké li kante mèm. A bon antandèr salu !

Justin