Mi arviin si kestion zéleksyon paran.
Koméla dann zékol, kolèz, lisé la invant sit internèt ; bann responsab i di zot la fine kontak tout paran pars zot la mèt si lo sit internèt.
Avèk sa, kan lé bien fé, i armèt in lafis deriér griyaz.
Po responsab paran, normalman linformasyon la fini pasé ; mi trouv drol dan lo karné mon zanfan, mi oua pa okin mo po prévnir a moin minm !!
Trouv pa drol promié kou d’fil mi done, mi ginye po répons : « rényon paran, mé koman mi viin rényon paran si personn i di pa moin na rényon ?! »
Zordu, marmaye i ginye pran lo bus tou seul ; la bann paran i viin an loto, i rèss su parking ; zot i apros pa so griyaz : donk lo pano (ke lé pa destiné po bann zélèv non pli) lé pa lu, donk li la serv arien !
- « Internèt, di mon paran, in lordinatèr mi koné pa alimé !? »
Di pa lu son zanfan va rouv po li : li na poin lordinatèr, donk li la poin internèt ; mi pans la Rényon na o moin la moitié paran, si la pa plis, na poin lé moyin …
Kan ti touch lo RMI, Assedic, ou sinon lo minimum vieyess, minm ek in zalokasyon familial, ti pé pa asèt tout ; ti pans dabor lo prioritèr, lo manzé, boir, abiyé, bann kayié, krayon la rentré ; aprè sa si na krédi, i fo payé ; minm loto koméla, mi koné d moun na permi, mé i ginye pi avoir in loto ; koman i sar pay lesans ? parl pa internèt !
Pli grav sé ke sef détablisman lé kontan d’li, pars réktèr i di : « wala in létablisman i aplik bien zinstriksyon ofisiel ! » Ti parl, ofisiel po ki ?
Alor, oui kroi ankor tout do moun na internèt zot kaz ?

 Justin