D’apré sak moin la antann dir la konpagni Air-Madagascar lé bien annuyé. Li sré mèm dann l’agoni d’apré sak i di plizanplis. Pou kosa d’apré zot ? Pou plizyèr rézon pars la plipar d’tan in sèl koz pou la mor, sa i sifi pa é i fo plizyèr.

Sanm pou moin, mé zami, sa sré ankor in n’antourloup a la mode Didier Robert. Mé zot va dir amoin kosa mésyé Didier i vien fé ladan ? Zot i koné li lé prézidan konsèye réjyonal. Zot i koné galman air austral sa i apartien in sosyété finans, konsèy réjyonal néna la majorité ladan. Ziska lèr na poin arien lé anormal mé la suite i san l ’aye konm zot é moin la tandi dir. Pokoué ? Pars konm Air Mad lété an difikilté, Air Austral la déside ashté 49 % lo bann par donk la moityé. Bone afèr zot va di ? Majine in kou La Rényon par Air Austral, épi par Konsèye réjyonal i dovien propriyétèr par moityé in kon pagni d’in gran péi avèk la promèss fé bénéf pli ki an fo.

Mé oila, Air Mad i doi in bon moné Air France é zot i koné l’èye dé Kahin, in sèrtin Malet sé l’éspyon a titré par raport Air-France. Ala ké Air Frans la anprète Air Mad tout kalité vyé vyé l’aviyon lé zis bon pou gingn l’apopléksi é kan lo laviyon i rant an pane é bin i fo ranplas lo bann l’aviyon moiyénan moné épa in pti pé mi pé dir azot… Aprésa, zot i koné kan in zanimo i tonm rède mor moush i manj ali : lo moush dann in ka konmsa sé Air Austral, sé Air France, sé Air Kénya épi d’ot ankor. Koman i fé sa ? Sinploman zot i ranplas Air Mad dsi bann lign réjyonal é sé zot i ankèss la moné kont in promèss tourist. Anne ma sèr Anne i oi arien vénir.

Astèr konm zot i koné Air Mad lé dann l’agonii é Air Austral lé konm k’i diré plizoumoin solidèr la dète la konpagni malgash. Air Frans épi d’ot konpagni lé an anbiskade. Air Austral konm i di, pou son par i manj o pyé mé final de kont li va manj ali li mèm-li va manj son foi konm mésyé lo foi é aprésa : lo gran stratèj didier la ankor frapé é l’amityé rant bann pèp va sort ladan an lanbo. In foi anplis !