Sak moin la di an-o la, i diré sé konm in n’afèr i sort dan la boush in kouyon. Bien antandi in moun néna in pé lo bon gou, in pti pé rafiné, mi oz prétann li va di li profèr lo flèr natirèl. Pou kosa ? Par lo flèr natirèl néna tout son kalité natirèlman. Kisoi son parfin, kisoi son boté, kisoi son manyèr élégan pou prézant ali dan la natir . Arzout èk sa la lite kont la polisyon !

Antansyon lé ga, dsi so poinnvizé, mi kal azot moin-la. Pou koué ? Pars l’om i doi fé fass in problèm li la kréé li mèm. Problèm-la sé la polisyon, tout kalité la polisyon a komansé par bann gaz avèk éfé d ’sèr mé pa solman é tousa-la lé pa bon pou la santé.I paré mèm la polisyon, shak ané, i tyé par-la sète milyonn d’moun san konté sak i tonm malad, i mor pa, mé i port movèz santé. Donk l’om la fé travaye son l’imazinasyion é i pé pa dir li la pa gingn fé dé shoz bon pou la santé épi pou protèz l’anvironeman é sov la bio divèrsité.

Sé konmsa ké laba dann la chine dann l’ané 2020, sète ané par l’fète, i sava fé in vil pyé d’boi pou trant mi pèrsone : in komansman si zot i vé, mé va vnir plis par la suite. Astèr mi vé anparl azot in pyé d’boi artifisyèl bann zinzényèr méksikin la invanté. I di in pyé d’boi, mé dann la réalité sé in konstruksyon métalik kat mète otèr par-la. Son lorizinalité, li fonksyone konm bann pyé d’boi – fotosintèz é tout lo tranbléman - é li nyabou élimine bann polisyon dann l’androi na poin asé pyé d’boi natirèl.

Parèye in pyé d’boi moin la di : non, pars li tousèl i zoué lo rol 368 pyé d’boi – in vré pti foré. Konm moin la di dann in landroi urbin na poin la plass pou plant in foré d’pyé d’boi. Dan in bonpé vil lo Méksik, bann mèr i pèye pou instal bann pyé d’boi artifisyèl konmsa. Lé vré ké avansa zot la komans par arash la foré, mé i fo bien répar in tablatir l’om li mèm la invanté partou ousa li pass.

Alor ? Kosa zot i profèr ? In pyé d’boi artifisyèl, sansa in pyé d’boi natirèl. Biensir in pyé d’boi natirèl ! Mé kan i fo pass par lo pyé d’boi artifisyèl, dann désèrtin l’androi i fo pasé. Kan fo y alé , i fo alé ! Konm i di dann lo shanté. Mé sirtou pa pran sa konm prétèks pou kontinyé abate la foré.