Mi sort lir dsi linternet nana katrovin-dis pour san d’moun dsi la tèr i fé kui manjé dsi bann foiyé tradisyonèl : la plipar d’tan troi galé, in marmit par dsi, épi doboi, sansa sharbon, sansa ankor la tay zanimo sèk, la tourb é tout lo rès. Forséman, lo gaz lé si tèlman shèr, léstrésitélé ankor rar konm korn lapin ! Solman sa nana son linkonvényan : la foré in pé partou lé dann danjé- i rès arienk dé pour san la foré dann Haïti !-,in gran kantité gaz-léfé d’sèr ( plis in milyar d’tone !) ki goumant ankor léshofman klimatik.

Sé in n’afèr i fé travay la tèt bann zorganizasyon internasyonal, bann lantropriz galman épi bann péi la pankor bien dévlopé. I fé travay la tèt pou koué ? Pou prézèrv in pé la natir, é pou k’lo moun i trouv "lo karbiran" k’i fo pou kui manzé... Si zot i sava dsi linternet, zot va oir tout zidé d’moun nana pou sa épi lo bann rézilta pou fabrik in four konm k’i fo, par tro shèr sirtou é pli éfikas ké troi galé dsou in marmit. Par plas sé in four solèr, par plas i ansèrv bann réstann boi an granilé, par plas i ansèrv la tourb, par plas in pti paké pti boi sèk. Boudikont lidé i mank pa é bann rézilta lé bon.

Mé, firamézir, moin l’apré ékri, mi rapèl in n’afèr. Kosa solon zot ? Lo four vietnamien. Kosa lé sa ? Sa in lidé Paul Vergès la raporté péi Vietnam-zot i koné pandan in bon koup de tan nout parti l’avé rolasyon suivi avèk lo Vietnam, sirtou dann tan la guèr libérasyon, dann tan té dir vèy pa, é alé la-ba sé fé mark out nom dsi kayé lo mor la CIA, é la pa in plézantri, mi pé dir azot. Donk Paul Vèrgès la pran lidé-la la-ba, épi dann vilaz Titan, dann port, in kamarad la fé in modèl, la amontr partou. In pti poigné granilé sansa pti réstann boi l’avé asé pou kui manzé. Aprésa, té i pé ansèrv la sann pou sak la sann i koné fèr, dann jardin, dann po flèr, dann toilète lontan, lla tizane tousala..

Sa sé zis in souvnir, mé sanm pou moin sé in n’afèr ni doi maziné, l’èr in boutèy lo gaz i kout vinn-kat éro trann sète, l’èr l’érop i vé, d’apré sak i di, obliz anou tiliz solman léstrésité... Lo four vietnamien ? Alla in bon lidé non ? In n’afèr pou ardonn favèr…

Justin