Dann bann moun i travay dann spéktak, lé rar bann moun i travay a-titré. Dan la bann nana téknisien, komédien, dansèr, étsétéra-étsétéra, souvan dé foi i travay pa a-kontinié. I apèl azot bann z’intermittent du spectacle. zot la bézoin lasédik pou ginye zot soso. Pou lo medef*, i fo le sistèm lé ékilibré : in larzan i sort, mem kantité larzan i rantr. Lo gouvernman mem konplis, i di sa bann zaktèr sak lé rish i gaspiy larzan l’asédic. Sa in manièr pou sakrifié bann ti-kolon la kültür.

So foi isi, i di azot i fo zot i travay sinkant èr par moi, pandan di moi pou giny l’asédik.In pti tré pé va ginyé, in bon pé va gard dann in trou, akoz le medef i pans bann ti-kolon la kültür sé in bann abüzèr, in bann parès, in bann trïkèr, i ginye larzan épi i travay pa pou la valèr. Solman i di osi, si na poin bann moun i travay pa a-kontinié, na poin piès téat, na poin sinéma, na poin konsèrt, tousala. Alor mèt zot révèy a-lèr, arèt shant la mantri, arèt di in nafèr épi lo kontrèr an mem tan. La kültür i fé la grandèr in péi. Si in péi i néglij son kültür, ti-lanp, ti-lanp lï va kïl arièr
Pou nou, nout kültür sé nout rasine. Nou lé pti, nou la bézoin nout rasine lé for, lé solid. Bann z’intermittent, sa in bann profésionèl, sa nana in bon métié dan zot min. Sèl problem, zot i travay pa toultan. Solman zot i manz tou lé zour. Goni vid i tienbo pa d’bout. I fo lé ga i ranpli zot léstoma pou travay pou lo péi. Lé vré, la pa pa vré ?

Justin

* syndicat des patrons.