In tan, téi apèl sa la “réaction”, sansa dann langlétèr téi apèl sa bann konsèrvatèr, sinon la droit tou-kour. Épi lo lou la mète la po mouton dsi li : nou la antann parl la réform, sansa lo libéralism. Banna la vouli fé anval anou la konstitision éropéenne, la manké pou in tan... pou in tan solman.

Gouvèrnman, komé-la, li “modèrniz”, li pans li lé “modèrn”. Konm si lavé in modèl kékpar épi pou fèr bien té falé kopié déssi. Modèl-la la pa Lamérik, mi éspèr. Mé i fo zamé di la pa sa, san alé vérifié ! La pa l’OMC kant mèm ? Parèy, i fo pa di la pa sa, san alé oir d’pré mèm si nana in sosialis i apèl Lamy i diriz sa.

Bin alors, kossa i vé dir modèrn dan la boush in pé ? La pa tro dir pou savoir : pou bann vaza i donn azot kado, pou bann ti-kolon i fo sèr la sintir. Pou in prézidan i fo goumante 206 pou san son salèr, pou in travayèr i fo travay plis pou gingn plis... a s’ki paré. Pou in pé, i di LA Frans lé o flan, pou d’ot nana ankor larzan. Épi i armète anlèr lo kapitalis pir é dir.
Zot la di “modèrn” ? Non i arsovaz lékonomi épi lo sosial, sinploman.

Justin