Matant Zélida la ékrir Justin :
Mon shèr nové, mon spès salté rouj-de-fon dopi létèrnité mi oi bien sak zot i di é pou kosa zot i di dopi dé tan é dé tan lo mèm rangène. Zot i di lé zot lé pa kapab, lé pa konpétan, konmsi zot lété konpétan zot. Si zot lété konpétan, néna lontan lopinyon piblik nora koni épi rokoni é nora romète lo pouvoir dann z’ot min. Sof mon réspé la pa sak lopinion piblik i fé é la pa lo shomin li pran zordi. Fransh vérité, si vréman zot bann rouj-de-fon lété pli konpétan ké lé zot néna lontan zot noré fine pran lo pouvoir. Tok ! Pran sa pou toi !

Justin la fé pou répons :
Mon vyé matant k’i koz toultan la boush rouvèr, sak ou i di i étone pa moin ditou. Matant ou i parl lo pouvoir mé ou i obliy in n’afèr sinp : ou i obliye lo pouvoir isi dann La Rényon lé kassé an morso : pouvoir minisipal, konsèye départmantal, konsèye réjyonal, kominoté d’komine, épi néna l’éta local avèk lo préfé épi son bann lantouraz pintade. Divizé pou régné, sa sé in bone fason anpèsh in pèp prann son résponsabilité.
Dézyèm zafèr sak i konsèrn la konpétans dizon la kapasité : matant ou la zamé poz aou késtyon pou konprann pou kosa kan l’éta i anvoye demoun dann l’outre-mèr é isi La Rényon vi k’sé sa k i konsèrn anou, banna i amenn dann zot séktèr la politik demoun fatigé. Fatigé épi vantar konmsi sak zot i fé i agard pa nou… Matant sa i rapèl amoin lo prinsip Peter k’i di konmsa, v’ariv lo zour bann post résponsbilité sar okipé par d’moun la fine trap zot sèye linkonpétans é pou sèrtin mi pans nou lé d’dan. Tok ! Pran sa pou toi.