Rèzeman lo peup chagossien la trouv à Sak fwa in solission pou en sorte à zot, ce ki fé ka la fin bande zanglé la désside déporte à zot, ek toute la suite ke zot y koné sireman.

Mr Harris ÉLYSÉ y explik : "si bato lalimentassion té abitié amène 20 porsion do ri, li la komanse par amène soleman 15, après 10, ziska lo zour la pi liv di tou do ri. Zot té manze fri a pin boui." Té i live pi lo té (banna y bwar pa kafé zot). Zot té y mète do sik dann lo, en guize lo té. É aprè kan lavé pi do sik, zot té y kass koko, zot té y bwar do lo pou ramplasse lo té. Té y di à zot, lavé in cyclone la passé Moris, après la di la guèr la pété dan le monde entier. Ziska tank la pi amène rien pou zot manzé.

Ou pé imaziné in nafèr inhinimin kom sa ? Sa y rossamb kom in zénocide. Kan ou y pense bann zamérikin ek bann zanglé lé vi konm lé shérif dé drwa de Lome dan le monde entié ! A la zot vré forfé ! Bann mantèr, bann kriminel. Na in rappor lé fé par in l’ONG bien koni, i di zot la komète trwa krime konte limanité dann le ka lo peupe Chagossien.

Rèzeman, bann chagossiens la pa espère boudin kui dann vante kosson. Zot la démaye à zot konm zot té y pé pou trouv in nafèr pou manzé épi pou nouri marmaye. Si bann Chagossien té pa in peup intélizan, invantif et kombatan, banna noré mor la faim la ba dan zot ti zile et persone nar pa konète kossa la arive à zot ! Nar té koné mêm pa si zot la eksizté. Té pa besoin déporte à zot, lafèr té dan le sak !

Mank de po pou bann zanglé ek bann zamérikin, lo peup chagossien la soizi la rézistanse, zot la soizi.

Soubate pou zot vi, pou zot drwa et lo temps va donn à zot réson.