Oté

Zot va fini par oir larzan sa i manz pa !

Justin / 18 out 2018

JPEG - 43.6 ko

Larzan-la moné - i paré sa lé vyé konm lo mond. I parétré li la komans lo zour bann demoun la fé l’éshanj sak zot l’avé avèk sak zot l’avé poin. An débitan l’avé in form moné banna i apèl sa primitiv épizapré li la pran d’ot form ziska sak ni koné koméla-mèm i anparl bann moné dématéryalizé. Alé rodé ou !

An touléka avèk sistèm kapitalis lo larzan lété pi arienk kékshoz déstiné pou fé l’éshanj bann bien, mé la vni in valèr par li mèm-lo sèl valèr, boudikont bann kapitalis i rokoné. Konm sa zot la désid larzan té i doi vni lo mète di mond é zot la fé sak i apèl mondyalizasyon. Alé ousa k’ou i vé, dann bann vil, konm dann bann dèrnyé rokoin, li lé la, é san li, final de kont, kont pa ou va nyabou fé in n’afèr. Ou lé riskab mor la boush rouvèr !

Arzout avèk sa néna bann mètr lo mondyalizasyon é zot zot i vé kontrol tout, désid pou tout kisoi bann gran péi, kisoi bann gran sosyété konm Total épi d’ot ankor. Antansyon si ou i vé pa aplik la loi larzan ! Tansyon pangar, désèrtin i pé kondane aou krèv do fain si ou lé fèb.

Pars si ou lé pa fèb, ou i pé rézisté… Néna poin lontan l’amérik la domann in gran péi konm l’Ind aksèp lo mondyalizasyon dann domenn manjé. Promyé minis l’Ind la fé pou répons li néna in popilasyon nonbrèz pou nourir donk li pé pa pran lo risk fé mor d’fain in grann parti son pèp. Zot i souvien kan gouvèrnman l’Ind la fé arète lo lésportasyon désèrtin ri-konm lo ri basmati- : sa lé kontrèr la mondyalizasyon, mé pa dann sète la popilasyon.

Larzan dakor, mé kan nora pi séréal, kan nora pi frui, kan nora pi légime, kan nora pi légiminèz-kansréti nora larzan par kantité, sharjman, balo sou tout son form, moin lé sir é sèrtin l’imanité va rann aèl kont larzan par li mèm sa i nouri pa son onm. Larzan sa i manz pa !