Mésyé, médam, la sosyété, koz avèk moin sé koz avèk in kouyon - sé o pyé d’lo mir i oi lo mason. Mi pans zot konm moin, dann tan nou lété marmaye nou té i zoué pti zé la. Mi éspèr sa lé ankor vivan zordi é bann ti marmaye an misouk i doi zoué sa. Mé, sanm pou moin, sa sé in krétik i adrèss bann ramasèr mantèr. Ramasèr mantèr ? Sa la pa in n’afèr i mank dann nout sosyété : i mank pa d’moun pou fé pran aou blan pou noir, makaroni pou la bouji, po d’shanm pou pla kouvèr. Mantèr konm in rashèr d’tan i di sa. Mé zot i koné : mantèr i donn flèr, mé sa i done pa frui. Alor, i fo méfyé pars momandoné pèrsone i kroi pi aou é ou mèm ou i koné pi kèl mantèr ou la ramass avèk kisa. Si tèlman talèr ou sar blizé mark dsi karné pou pa mète aou tro dann l’anbara. Alé ! Mi kite azot rofléshi la dsi é ni artrouv pli d’van. Sipétadyé !