Ala lèr zéléksion lariv ankor. Sétaki, dann son rèv, i kalkil li sar méssié lo mèr, méssié lo konséyé zénéral. I fo sa, mé antansion, si ou la pa bien prépar out kou, pou rèt a tèr, sir ou va rète atèr. Sa lé konmsa mèm : na in bonpé dmoun i pran dépar gran-rèd, mé na arienk inn i ariv promié dann shak kalitégori.

In kours t’in kours, mé in zéléksion sa sé inn’ot afèr : lo mèr, lo konséyé zénéral sa lé anlèr pou in koup de tan. Ni vote pou li - in moun, sansa in lékip -, mé nou la pa toultan déyèr li, pou oir si li amène in bon politik. Alors, sak i fo, sé k’lo kandida i propoz anou in bon program pou lavnir La Rénion, pou pou bann ti-kolon, pou bann zènn épipou sak i vé mète lo péi anlèr. Sansa, i ansèrv de rien !

Si rant bann kandida, i pé an avoir troi-kat i tonm a-popré dakor pou in program. Kossa i fo fèr ? Si tout i san zot kor, tout lé riskab rèst atèr. Tansion lorgèy, sa la pa in bon zafèr sa ! Sak i fo, sé lantant konmsa va aplik in bon program. Oté ! Sa la pa in zé, la vi lé tro dir pou bonpé dmoun !
Alors, zoué pa pèrsonèl ! Mète ansanm outor ! N’artrouvé !

Justin