Zéléksion lo mèr épi zéléksion konsèy zénéral i tard pa : dizon dann troi moi, lo zafèr sar fine fé. Donkalor, i fo bien kalkilé kossa ni sava fé, kèl tik-tak i fo mète anlèr pou fé avans in pé plis La Rénion. Sa mèm zéléksion i ansèrv ! Vré, pa vré ? La pa po fé gonf zabo in pé, épi zot i kroi zot mèm lo roi. Si sé pou sa, i pé s’an passé, é lo bann zéléktèr i pé rèss asiz z’ot kaz.

Pou moin, sak i kont, sé lo program bann kandida. Zot program, épi koman zot va mète an akor la zot avèk sète lé zot, épi sèt konsèy rézional, sèt konsèy rézional... Sak i kont, sé koman zot na lintansion débrouye zot kari pou mèt lo maksimome larzan déssi bann prozé, fason k’i roul ron, é k’i kalbite pa dan la kivète. Fason k’i fé travay nout zénès.

Nou nana tro problèm pou fé lintéréssan, pou oubli lintéré zénéral, pou k’ni mazine toultan nou la poin lo tan pou pèrd : i fo ni fé vit, i fo ni fé bien, i fo ni fé nout méyèr possib pou prépar lavnir nout péi épi nout pèp.

Alor, dann so kondision, i fo pa ral ninport koman. Zoué pèrsonèl la pa bon ! Plito ni mète ansanm pou fé gingn La Rénion.

Justin