Domin i tonm la fète dé mèr é moin la konm in l’anvi fé in modékri la dsi. Lé vré zot va dir amoin la rolasyon shakinn rant nou néna avèk son momon, kisoi mor sansa vivan, prézan sansa absan, sé in rolasyon pèrsonèl é dann sète afèr-la, mi pans sèryèzman néna otann rolasyon ké néna d’zanfan dsi la tèr.

Mé konm i di, souvan dé foi, in késtyon pèrsonèl, kék par, li pé rant dann trin l’inivèrsèl é mi pans sa lé vré pou la rolasyon zot konm moin néna avèk nout momon. Biensir la pa in n’afèr sinp pars néna in bonpé santiman, in bonpé zémosyon, in bonpé ralé-pousé kontradiktoir, in bonpé souvnir i rant dann zé dann sète afèr-la. Mé kant mèm néna défoi in tré i sirmonte lé zot.

Tré-la, mi pé apèl ali sinploman « lo dovoir ». Fransh vérité, mon momon lété in moman devoir. Mi rovoi aèl vi k’èl lété amontrèz lékol apré fé travaye bann marmaye bénévolman lo soir apré l’èr normal lékol, lo zédi kan dann tan-la lété konzél, épi mèm kan lo tan sèrtifika té i ariv, dimansh apré la mèss.kèl kouraz ! Kèl kouraz èl l’avé !

Aprésa, mi koné pa koman i fé, èl téi trouv ankor lo tan pou fé travaye anou : aprann légzèrsis de mémoir, tab miltiplikasyon, léson tout kalité matyèr... Mi rovoi aèl malad-dann tan la la médsine lété bète-bète - apré fé lo kék pa l’avé rant son lozman épi lékol pou alé vèye bann marmaye dann in tan téi apèl z’étud. L’èr sé l’èr, lo dovoir sé lo dévoir, é èl téi mank pa !

Kan la maladi l’arivé for mèm, mi rapèl, mèm nou lété fine gran èl té i intérèss travaye ni fézé, mèm nout dévoir. In frèr i prépar l’agrégasyon i vien lir son dévoir avèk èl. Inn i rofé son léspozé ; l’ot ankori intérèss zournal i vien lir in l’artik li la trouvé é li la trouv intérésan. El té i ékout sa avèk pasyans, in pasyans l’avé pi d’fin !

Momon néna lontan ou la parti, é mi rogrète sa zour konm nuit, pars ou lé pi la pou guide anou, pou indik anou lo bon shomin… I paré néna inn vi apré la mor. Mi koné pa si lé vré mé si lé vré mi éspèr zour-la épi mi rodout ali an mèm tan ; mi domann amoin kèl zizman ou i port dsi moin, dsi mon vi é si lété posib èl i di amoin : « Ou osi mon garson ou sé in om de devoir ! ». L’èrla, fransh vérté, pou vréman moin sar dann paradi.