Lé ga ! M’a di azot in n’afèr : moin na poin la shans oir, souvan dé foi, zournal an kréol déssi RFO. Poitan, mi fé zéfor : akoz konm mon kaz nana konkour télékomann. Kan ou i komans agard in n’afèr, klik lo télé la fine ariv déssi in n’ot afèr. Donkalor, si ou i oi lo komansman in nouvèl, ou la pa sir oir la finision. Dé foi, ou i trap solman in bout dann milié. Épi, afèr mantir, mi èm bien antann kréol dann télé ; pou moin shak foi, sé konm in pti viktoir déssi la bétiz idéssèrtin moun.

Pou pa koz initil, mi di m’a gard zournal an kréol, talèr,mé bondié k’moin la poin la shans. I fo dir azot zournal-la i fé pa toultan mèm lèr, Épi, lé kourt-kourt. I fo avéyé mèm, sansa ou lé mor. In foi, mi avèy, mi avèy mèm... somèy i pèz amoin atèr. Mi lav mon figuir, mi arlav... Mon tète i kant mèm, é kanté pou vréman. Toudinkou, mi tonm in néstan dann fénoir. Kan mi sort mon fénoir, zournal la fini... Dé foi, zournal an kréol lé... an fransé, mi argrète moin la pa parti dormi.
Alors, i gingn pa trouv in bon solision pou sa ? Lé bien, fé in zournal an kréol, mé lé pli mié fé oir... Fransh vérité !

Justin