Oté

Zourné 8 mars : lo draw fanm, la pa gingn sa la roulèt !

Pol / 12 mars 2019

JPEG - 43.6 ko

Lo 8 mars i vyinn éspasé. Bann madanm té anlèr, té alonèr. Té lozik, akoz sa té in zour inpé éspésyal : Zourné internasyonal lo drwa fanm. Sétané, fo romarké, la Rényon la fé asé for, li té vé pa pass pou karyol bourik. Zournal konm radyo, télé, tout kalité médya, la fé zot zaktyalité ladsi. La ékri in ta zafèr, la koz osi in bon pé. Anpliskésa, partou navé kékshoz d’si fanm. Tan myé, banna i mérit si télman.

Zordi, sétin satisfaksyon, d’war koman lo drwa bann madanm dann la sosyété la gingn an avansman, konparé dann tan avan, sinkant ou swasantan d’sa, minm si néna ankor shomin pou travèrsé. Mé lavansman k’nou koz, ké nout tout lé fyèr zordi, isi la Rényon, la pa gingn sa la roulèt , lo mwa pasé ou lotrané. Dopi avansa, néna fanm la dobout, la sobat pou fé réspék ta zot, pou fé réspék zot drwa, pou fé shanz lo systèm dann nout péy. Bonpé i pans pa sa. Bli pa, na pwin zordi, si navé pwin yèr !

Sé pousa, mi kroi k’néna in kékshoz la manké. Mi konpran pa koman an parmi tout bann moun la fé tapaz, zisté rézon dayèr, d’si lo 8mars, la pwin inn la mazine mèt in pé anlèr, bann fanmm avan, nout zéné la fine désot la vi, bann té promyé pou dobout, té pionyér dann batay pou lo drwa bann fanm rényonèz. Kan minm pa tout, mé o mwin détrwa foutor ! Domaz ké dann tout lo tapaz lo 8mars, zot té lé gran zoublyé d’la zourné. Sétin gro lérèr, zot té mérit byin inn ti mo, in lomaz. Té kout pa gran shoz.

Alor, a bon antandèr, mwin lé anvi dir a zot ék modésti, anrozis byin dann zot méninz, pou lané proshinn, so réfléksyon d’in gran bononm la kit a nou , na inpé d’tan d’sa. Li lavé di in zour, souvan minm dayèr : « Bli zamé, lo batay zordi konm sak domin, i konstrwi a li touzour d’si lo konba nout zansèt ».

Pol