In zanfan dsi dë lé pov, pars li lé né dann in famiye pov. Pov ! É sa i konsèrn son santé, lo soin li néna sansa li la poin, son lédikassion, son kroissans, son parkour kilyirèl, son karanss dann vitamine épi d’ote zafèr, son kaz... Na poin lontan in moune la di dovan mwin si in bann marmye lékol i réissi pa lé pa solman par raporte noute lang kréol néglizé épi méprizé… lo bann kondission sossio-ékonomik i konte galman. Mi panss li néna rézon mé lo pé d’ka k’i fé avèk noute lang matèrnèl ébin sa i aranj pa lé shoz.

Lo pir dann toussa, sé la promèss l’avnir. Kèl promèss l’avnir pou in zanfan pov ? Kèl promèss l’avnir pou toussa bann pov néna La Rényon ? La plipar d’tan zanfan pov zordi domin sé bann paran pov zénérassion an zénérassion, zanfan lé pov galman épi l’avnir boushé pou bann jenn zadilt é toussala i spass dann in sossyété san dévlopman… san léspoir d’ dévlopman

Mé si ni konte bien ni parl bann zanfan pov, ni pé parl ossi bann travayèr pov, bann shomèr pov, bann rotrété pov é toussala dann in sossyété la povrété lé in pé partou… in pé sirman i panss i fo pran bann mézir spéssifik pou tèl katégori, tèl katégori ébin pou mwin sa sé in n’afèr i marsh pa — sa sé in pansman dsi in zanb de boi !

Sak i rofiz, zordi, bann rényoné i rotrouv azot pou diskite dsi l’avnir konm noute parti i réklame dopi lontan, mi panss zot i porte in grav résponsabilité. Kan noute parti i domande in plan fé par bann rényoné pou bann rényoné, mi oi pa sa konm parol anlèr. Mi oi sa konm in nésséssité.

An atandan alon kontinyé vèrss noute larm krokodil dsi bann zanfan pov, dsi bann shomèr pov, dsi ban travayèr pov, dsi bann mémé épi bann pépé galman dann la povrété…

Koulé noute larm krokodil, ! Koulé ! Pou kèl rézilta ? A bon antandèr, salu !

Justin