Afér ? Ebin, pars Tikok étan-mti, té i inm poz in voyaz kestion son lantouraz. Olèr domann « akoz ? », li té di : « Afér ? « Afér, isi ? » ; « Afér, laba ? » ; « Afér tel soz i espas dann tel manir ? » Tout fason, si li té dmann « akoz ? », son frèr Zan-Lik té i mank pa arvir ali : « Akoz margoz lé amér, lo grin lé dou, la rasine lé plat ! »
Soman, ek son zafér « afér-la », Tikok té i fatig domoun.

Na in kou konmsa, Tikok i oi son matant Eliz i pas dann somin. Tou zis si lo matant té i gingn marsé, si-telman lo vant té bel ! Tikok i dmann : « Afér lo vant matant Eliz lé gro, monmon ? »
Zan-Lik i antan sa, li mét son dé min dann son pos, li sort déor, li sif : « Fffiii… fffiii… fffiii ».
Gramoun Biganbé, apo dégrinn maï, i grat in kou son gorz, i sas in nti poul l’apo avaz ali : « Ssit ! Ssit ! Ssit, ti poul ! »
Granmèr Tisia, son koté, i rakoki son rin po trap in piés linz dann son tant koutir. El i mét-a-shant pli for son romans légliz : « Sé lo moi dé Marie-é, sé lo moi lé pli bo ! ».
I rét monmon tousél, estér, po réponn. Madanm Biganbé lé zéné, soman el i pérd pa kouraz, i réponn :
« Out matant i sar gingn in zanfan !
– Afér ? Tikok i domann, son zanfan lé dan son vant ?
– Tikok ! Madanm Biganbé i arvir. Estér, alé zoué ! »
Tikok i persis, i dmann :
« Bin ! Afér lo zanfan kouzine Zoumine la ariv dann laviyon, li ? »
Madanm Biganbé té i atann pa kestion-la, konm el lé pri dan la kol, el i ogard son mari. Gramoun Biganbé i konpran, i trap Tikok par la min, i di :
« Alon, mounoir ! Anon, n’a rod in pongné manzé lapin !
Epi fini an plézantri, li azout :
« Dan la vi, i fo pa soman rod "afér", i fo tas moyin sort dann fér ! »

Christian Fontaine